Gari Uranga (ZAE traineruko prestatzaile eta arraunlaria): «Itxaropentsu gaude denboraldi berrirako; ausartak izan behar dugu»

Gari Uranga, ZAE traineruko entrenatzaile eta arraunlaria.
/ETXEBERRIA
Gari Uranga, ZAE traineruko entrenatzaile eta arraunlaria. / ETXEBERRIA

Gari Uranga dugu, bigarren urtez, ZAE traineruko entrenatzaile eta arraunlaria; itxaropentsu agertzen da gaur hasten den Ligarako

ANTXON ETXEBERRIAZARAUTZ.

Asteburu honetan hasten du Zarautz Babyauto traineruak denboraldi berria. Pasai Donibanen izango dira ARC1 Ligako lehen bi estropadak, gaur eta bihar eguerdian. Zarauztarrak denboraldi txukun bat egiteko itxaropentsu daude. Aurre denboraldi ona egin dute, baina gaurtik aurrera ikusi behar ... Gari Uranga izango dute bigarren urtez entrenatzaile eta arraunlari. Berarekin egon gara eta oinak lurrean, baina helburua ohorezko tandan ibiltzea dela adierazten du.

-Gari, joan den urtetik denboraldi honetara arraunlari aldetik aldaketa handirik ez duzue. Seinale ona, ezta?

-Egia esan, joan den urteko blokea mantentzen dugu. Bi arraunlari berri etorri zaizkigu Igor Gurutxarri eta Angel Mari Urcelay, lehen ere gurekin ibilitakoak. Hauekin batera, joan den urtean nahiz eta jubenilak izan udan gurekin jardun zuten hiru gazte ditugu: Alain Gurrutxaga, Manex Otaegi eta Gorka Zubeldia, aurten seniorrak dira eta neguko lana gurekin egin dute, haseratik gurekin izan dira.

-Zenbat arraunlari dituzu denboraldirako?

-Guztira 18, baina bat, Iosu Olabarria, lesionatu egin zaigu, eta baja izango da. Pena guretzat. Arraunlari gehienak etxekoak, propioak.

-Aurten iaz baino estropada pare bat gehiago izango dituzue; nahikoak dituzu 17 arraunlari denboraldi osorako?

-Bai, nik uste baietz. Lesioek errespetatzen bagaituzte behintzat.

-Aurredenboraldiko estropadetan maila polita erakutsi duzue.

-Neguan ondo entrenatu dugu eta egin ditugun estropadetan poliki ibili gara, azkenengoa joan den igandean Lekeition. Dena den, asteburu honetatik aurrera ikusi behar zein maila ematen dugun.

-Itxaropentsu gaur zabaltzen duzuen denboraldi berrirako?

-Bai, hala gaude guztiok. Joan den denboraldian 5. amaitu genuen liga, hasiera batean uste baino hobetoxeoago eta gure ilusioa beste urrats bat ematea litzateke, ahal dela ohorezko tandan ibiltzea. Jakina oso zaila izango dela, baina mutilei hori esan diet. Gero ikusi behar, baina ausartak izan behar dugu.

-Talde oso gaztea duzu?

-Bai, 18-20 urteko mordoa daude, eta beteranoenak Gaizka Garmendia, Aitor Jauregi 'Naxi' eta ni. Aurreko denboraldiarekin alderatuz, gazteek urtebete gehiago dute eta fisikoki egiten ari dira eta tenika ere mejoratzen.

-Talde arina zarete?

-Bai, indar aldetik sobere handirik ez dugu; indar gehiago duten traineruak izango dira gehienak, baina fisikoarekin batera teknika ere landu behar izaten da eta horretan egiten dugu ahalegin berezia.

-ARC1 Liga interesgarria aurreikusten da, kategoria polita arraunean egiteko. Zein iruditzen zaizkizu aurrean ibiliko diren traineruak?

-Berdintasuna izango dela nagusi iruditzen zait. Deustok indartu du trainerua, Plentziako Arkotek ere. Gero San Juan, Pedreña, Zumaia, Getaria, Camargo, gu ere hor egotea espero det... Ez zait iruditzen diferentzia gehiegirik egongo denik. Ea asmatzen dugun eta aurrean ibiltzeko gai garen.

-Joan den urtetik, traineru barruan aldaketarik somatuko dugu?

-Arraunketa aldetik, estilo berdinarekin jarraituko dugu; blokea egina dago; nik ere bigarren urtea dut entrenatzaile bezala eta arraunlariek errezago barneratzen dituzte esandakoak.

-Entrenamendu aldetik, nola joan da neguko lana?

-Ondo; joan den urtean okerrago joan zen. Aurten negua suabeagoa izan da, gehiago disfrutatu dugu.

-Zuk ibilbidea Zarautzen hasi ondoren, Hondarribian ibili zara urte askotan. Orbañanosekin ikasitakoak baliokoak izango zaizkizu zure posturako?

-Hondarribian oso gustora egon nintzen. Mikel Orbañanosekin asko ikasi nuen, fuera de serie bat da, baina aurretik Zarautzen ere maisu handiak izan ditut: 'Mendi', Quique Lopez ... Entrenatzaile bakoitzak bere estiloa daukagula iruditzen zait, ez gara bata besteari begira egoten. Dituzun arraunlarien arabera, arraunketararo modua jarri behar.

-Amaitzeko, instalazio aldetik, kexarik ez, ezta?

-Egia esan, ez. Ubegungo pabiloia 2008 urtean Udalak erosi zuenetik, askoz hobeto gaude; neguko lanerako fosoa ere badugu; beraz, alde horretatik ondo gaude.

Más