Enpresa txikiei bideratutako prestakuntza-saioak eskainiko dira Udal Elkartean

El Diario Vasco
EL DIARIO VASCO ZARAUTZ.

Enpresa txikiei bideratutako prestakuntza-saioak antolatu ditu Udal Elkarteak, euskaraz lan egiten laguntzeko. Hizkuntza kudeaketa hobetzeko saio teoriko-praktikoa eta testu eta mezu laburrak lantzeko ikastaroa eskainiko ditu Urola Kostako Udal Elkarteak.

2017an abiatu zen 'Enpresa Euskaraz Handitzen' proiektua Zumaia, Getaria, Aia, Zarautz eta Orioko enpresei laguntza emateko, euskaraz funtzionatzeko bidean aurreratzeko. Geroztik, Udal Elkarteak eskualdeko enpresa txikiei bideratutako prestakuntza-saioak antolatu ditu urtero.

Saio teoriko-praktikoa

Urrats bat gehiago emateko borondatearekin antolatu dira enpresa txikiei zuzendutako saio teoriko-praktikoa nahiz ikastaroak. Saio teoriko-praktikoan hizkuntzen kudeaketa hobe-tzeko erremintak azalduko zaizkie izena ematen duten enpresei; besteak beste, enpresa hobetzeko aukeren identifikazioa, marketina eta publizitatea, ingurune digitala, eta idatzizko eta ahozko harremanak. Saioa hilaren 22an egingo da, 13:30etik 15:00etara bitartean, Urola Kostako Udal Elkartearen egoitzan. Egun horretan parte hartu ezin duten enpresek beste aukera bat izango dute martxoaren 26an.

Ikastaro laburra

Bestetik, lanean idazten diren ohiko testu eta mezu laburrak lantzeko ikastaroa prestatu du Udal Elkarteak. Saio horien bidez, Urola Kostako enpresa txikiei lanean ohikoak dituzten testu eta mezu laburrak euskaraz idazteko erremintak emango zaizkie; testu mota desberdinak ezagutu eta idazteko aholkuak, Euskaltzaindiaren oinarrizko arauen lanketa edota testuen egituraren azterketa.

Ikastaroa hiru egunetan emango da: hilaren 30an, eta otsailaren 13an eta 27an. Saio guztiak 13:30etik 15:00etara bitartean izango dira, Urola Kostako Udal Elkartearen egoitzan.

Ikastaroaren kasuan ere, bigarren aukera bat eskainiko zaie eskualdeko enpresei. Izan ere, ikastaroa errepikatu egingo da maiatzaren 8an eta 22an, eta ekainaren 5ean.

Dagoeneko izena eman dezakete interesa duten enpresek Udal Elkartearen webguneko formularioa beteta link honetan: www.urolakosta.eus/eu/euskara-enpresan. Izen-emateko epea bihar bertan amaituko da.