Enbatak zarauztarrren bihotzak irabazi ditu

Udaletxeko plaza goraino beteta igande arratsaldeko harreran, gutxitan bezalako jendetzarekin. Zarautz Enbatarekin dago, eta argazkiak garbi erakusten du.
/AMAXKAR
Udaletxeko plaza goraino beteta igande arratsaldeko harreran, gutxitan bezalako jendetzarekin. Zarautz Enbatarekin dago, eta argazkiak garbi erakusten du. / AMAXKAR

Arraunlariek sekulako harrera jaso zuten igande arratsaldean play-offean lehen mailara igo eta gero

ANTXON ETXEBERRIAZARAUTZ.

Hitzik gabe, benetan izugarria egindakoa, txapela ken-tzekoa... Denboraldi hasieran jarritako asmo eta helburu guztiak gainditu ditu gure Enbatak eta datorren denboraldian onenen artean izango da gure trainerua, merezimendu guztiarekin. Liga guztian bezalaxe, asteburuko play-offeko bi estropadetan erakutsi dute arraunean oso ondo egiten dutela, fin, seguru, eta kuadrilla oso gaztea izanik, mentalki ere oso ongi prestatuak daudela. Benetan handia egin dutena. Ares eta gure Enbata izango dira datorren denboraldian onenen artean.

Larunbatean Bermeon, itsasoan, bigarren eta igandean Portugaleten, ibaian, lehenak, irabazleak izan ziren, bertara joandako 200 zaleen gozamenerako. Bidaiatu ez zutenek ere ederki disfrutatu dute telebistaren aurrean egindakoarekin, herriko tabernetan zer nolako zorion giroarekin gainera.

Igandean, Nerbioi ibaiko erlojupeko estropadan igoera lortu eta bertara joandako zaletuekin partekatu ostean, arraunlariak, denbora galdu gabe, 14:45ak aldera furgonetako bozina joaz Zarautzera iritsi eta Kulixkara zuzendu ziren bazkaltzera, lortutakoa ospatzera. Oinatz Artetxe arraunlariak bazkal aurretik esaten zigun bezala, «oraindik ez dugu sinisten egindakoa».

Merezi dute banan bana izendatzea: Oinatz Artetxe Urkia, Imanol Eizagirre Etxeberria, Beñat Eizagirre Urbieta, Joanes Elizondo Telleria, Iñigo Galdos Alonso, Gaizka Garmendia Iturria, Aitzol Garro Laskibar, Alain Gurrutxaga Lertxundi, Igor Gurutxarri Arizaga, Gorka Imaz Urretabizkaia, Ion Jauregi Agirretxe, Aitor Jauregi Letemendia, Josu Olabarria Agirre, Xabier Ormazabal Amondarain, Manex Otaegi Mendoza, Ekaiz Portularrume Iruretagoiena, Martin Rekondo Herrero, Garikoitz Uranga Iturralde, Angel Maria Urcelay Gonzalez de Txabarri eta Gorka Zubeldia Rezabal. Guztiak zarauztarrak, bost ezik: Iñigo Galdos (Errenteriakoa), Gorka Imaz (Orio), Jon Jauregi (Berrobi), Xabier Ormazabal (Tolosa) eta Martin Rekondo (Larraul). Eta guztiak gazteak edo oso gazteak, Aitor Jauregi eta entrenatzailea den Gari Uranga ezik.

Herriaren harrera

Eta zer esan, arratsaldeko harreraz. Herri osoa kalean: Musika plazan lehendabizi eta ondoren, udaletxeko plazan, gutxitan bezalako jende-tzarekin. Zalantzarik gabe, aurten egindakorekin, igoera lortu edo ez, Enbatak zarauztarren bihotzak irabazita zituen; hain kuadrilla gaztea izanik zortzi bandera eskuratzea errez esaten da. Hunkigarria izan zen herritarren harrera. Musika plazatik, txistularien laguntzarekin kalejiran Lege Zaharren Enparantzara eta marea urdina han zegoen, zain, udaletxeko plaza bete betea.

Xabier Txurruka alkateak zoriondu zituen lehendabizi. Andoni Egañak, nola Zarautzek hain moila txikiarekin horrelako traineru handia duen esan zuen bertsotan; segidan Jon Artola lehendakariaren esker hitzak...

Jarraian, 25 urte arraunari lotuta daramatzan Gaizka Garmendiaren txanda. «Gu arraunean ume ginela hasi ginen; hainbat pertsonek guregan eragin zuten, horien artean Joxe Makazagak. Txalo bat beraren-tzat, dagoen tokitik gaurkoarekin pozik egongo da». Era berean, arraun elkartean urte osoan ixilean lanean jardun duten guztientzat txaloak eskatu zituen, eta «noski zuentzat, zale eta herri osoarentzat. Larunbatean Bermeon 150 zale ata gaur Portugaleten 200 zarauztar. Zuen bultzadarekin lortu dugu. Gora Enbata, gora Zarautz».

'Naxi' eta Uranga

Arraunlarien artean aipamen berezia jaso zuen Aitor Jauregi 'Naxik'. 15 urterekin hasi eta 42rekin hor jarraitzen du, gazte guztien artean; eta nola ez era berean txalo zaparrada handia eskeini zitzaion entrenatzailea den eta azken bi urteetan traineruari buelta eman dion Gari Urangari. Biak gizon lasaiak eta humillak ikusten ari zirenarekin hitzik gabe zeuden.

Aurtengoa bukatu da eta hemendik aurrera, merezitako atsedena. Egindakoa ospatzeko aukera izango dute arraunlariek aurrerantzean. Bien bitartean, Artola lehendakariak, elkarteko ateak zabalik daudela gogoratu zuen. «Arraunean hasi edo esku bat botatzera hurbildu nahi duenak, badaki non gauden. Orain izan daiteke aukera». Babesle guztiei ere eskerrak eman zizkien.