Biharko Haur Agerraldiak 35 urte betetzen ditu

Bihar arratsaldeko Haur Agerraldiko zuzendariak izango direnak./
Bihar arratsaldeko Haur Agerraldiko zuzendariak izango direnak.

Udalak Haur Kultur Taldeko kideak omenduko ditu bihar arratsaldeko San Pelaio festen hasieran

ANTXON ETXEBERRIAZARAUTZ.

Hementxe ditugu San Pelaoiak. Bihar zabaltzen dira herriko zaindariaren ohorezko jaiak eta itxura batean eguraldia lagun izango da datozen egunotan. Biharkoaren aurretik, gaur eguerdian Erraldoi eta Buruhandien Topaketa egingo da; Bidasoatik eta Iruñeko alde zaharretik datozenak, gure erraldoi eta buruhandiekin elkartu eta kalejira egingo dute eguerdiko 12:00etatik aurrera.

San Pelaio festen hasiera, urtero bezala, bihar eguerdiko 12:00etan egingo da udaletxeko balkoitik botako den suziri eta txupinazoarekin. Une horretan Xabier Txurruka alkateak 'Makila' emango dio Haurren Agerraldiko danbor nagusiari. Aurten Mikel Ostolaza izango da danbor nagusia, arratsaldeko danborrada zuzenduko duena. Dena den, aurretik, eguerdi partean, buruhandi, erraldoi eta Mauxitxa txarangarekin, kalejira egingo da erdiguneko kaleetatik.

Eta arratsaldean, esan bezala, 18:30ean abiatuta, Haurren Agerraldia, aurtengoan 35. edizioa, beti bezala Haur Kultur Taldeak antolatuta. Ohikoa den bezala, lau talde izango dira, eta zuzendariak ondorengoak: Horiz eta Bista Alegretik, Mikel Ostolaza eta Lide Etxeberria; berdez eta Azken Portutik, Aiora Sanchez eta Nahia Aramendi; gorriz, eta Itxasmenditik, Anuk Egaña eta Izaro Urdanpilleta; eta, urdinez eta Inurritzatik, Ane Corta eta Saioa Prieto. Bakoitzak bere ibilaldia osatu ondoren, 20:00etan Lege Zaharren Enparantzan elkartuko dira, elkarrekin jotzeko. Gainera, Zarauzko Udalak Haur Kultur Taldeko kideak omenduko ditu bere XL. urteurrenean. Erraz esaten da, baina urtea joan urtea etorri, talde hau arduraratzen da San Pelaiotako danborrada ondo atera dadin. Zorionak!

Eta gauean, helduen danborradaren txanda izango da, dozena bat sozietateren partaidetzarekin (Arkaitz Mendi, Kayua, Carballeira, Arrano, Cachi Bachi, Udaberri, Francisco Zurbarán, Urpekoak, Ongi Etorri, Batzokia, Iñurritza eta Alkartasuna). Gaueko 23:00etan dute hi-tzordua eta Lege Zaharren Enparantzara iritsi eta bandera igo aurretik, danborradako ordezkariek Pepe 'Txabillo'ri 'San Pelaio Makila' emango diote, berak urteetan buruhandi eta erraldoiekin egin duen lanarengatik. Gauerdian, banderaren igoera ere 'Txabillo' eta bere taldearen eskutik izango da, Pelaioren ereserkia, Zarauzko Musika Bandak jota, abesten den bitartean. Festa hasiera honetan sorpresaren bat ere izango dela iragartzen zaigu. Eta hortik aurrera, Kresala taldearekin dantzaldia Musika Plazan eta, Munoako txosnagunean ere kontzertuak Rodeo, Rukula ta Ara taldeekin. Biharkoa festa hasiera besterik ez da; San Pelaioak osteguna bitartean jarraituko dute. Ondo pasa!

Contenido Patrocinado

Fotos

Vídeos