Zarautz

Basarri Bertsopaper Sariaren 41. edizioa abian jarri du Zarauzko Udalak

Zarauzko herria bertsolarien sehaska eta iturri izan da urte askotan. Hori dela eta, Zarauzko Udalak 1985etik Basarri Bertsopaper lehiaketa antolatzen du, urteetan zehar izan diren bertsolarien ahozko zein paperezko kultur emariari jarraipena emateko. 41. edizioa da aurtengoa, eta urte hauetan guztietan jorratutako helburu berak ditu ardatz: euskara eta bertsolaritza sustatzea, eta euskal sormenean eragitea.

Edonork parte har dezake lehiaketan, eta parte-hartzaile bakoitzak, gehienez, bi lan aurkez ditzake. Sari bakarra egongo da 1.800 eurokoa, eta epaimahaikideak Andoni Egaña, Nahikari Gabilondo eta Unai Muniain izango dira. Lanak aurkezteko epea ekainaren 20an amaituko da, kultura@zarautz.eus helbidearen bidez. Sari banaketa uztailean izango da, bertso astearen baitan.

Irabazleen artean izen ezagunak topa genezake. Lehen edizioa Pello Esnalek irabazi zuen eta ondoren beste zortzi baditu irabaziak. Aner Peritz izan da azken zarauztarra sari hau irabazten (2022 eta 23an).