Arkamurka Natura Elkartearen egitarau berezia 50 urteak ospatzeko

Natura dokumentaldia. Modelo Aretoan izango da Arkamurkaren 50. urteurrena ospatzeko. /  AMAXKAR
Natura dokumentaldia. Modelo Aretoan izango da Arkamurkaren 50. urteurrena ospatzeko. / AMAXKAR

Ohiko ekimenez gain, naturari buruzko dokumental sorta eskainiko dute iraila bitartean Modelo aretoan

JUAN MARI ZUBIAURRE ZARAUTZ.

Arkamurka natura-elkarteak 50 urte betetzen ditu aurten. Urteurren seinalatua da, zenbaki borobila. Urteurrena, gainera, bikoitza da, 40. Natur Astea baita aurten antolatuko dutena. Urtemuga hau ospatzeko ohiko egitarauaz kanpo bestelako ekimenak ere prestatu dituzte eta hauen berri atzo eguerdian Modelo Aretoan eman zuten bertako kideak.

«Naturaren ezagutza eta natur kontserbazioa helburu dituen taldea izanik, hainbeste urtetan irautea eta oraindik elkarrekin gure zereginean jarraitzeko gogoa izatea ospatzekoa da. Horixe dugu helburu, eta horretarako egitarau berezia prestatu dugu aurten», azaldu zuten aurkezpenean.

Mende erdi honetan izen aldaketak izan ditu natur elkarte honek. 1969. urtean sortu zen eta orduan Zarauzko Izadizaleak izenarekin bataiatu zuten taldea. 1983an berriz, Pagoeta Mendizale elkarteko Izadi taldea bihurtu ziren eta azken izen aldaketa 2001ean burutu zen egungo Arkamurka Natur Elkartea jarri ziotenean.

Lehen aldiz hainbeste urtetan, natur balioak eta gure ingurune naturala ezagutarazteko naturari buruzko dokumental sorta eskainiko dute otsailetik iraila bitartean (udako hilabeteak salbu). Hilaren azken asteartean eskainiko dira, 20:00etan eta ireki berria den Modelo aretoan. Natur dokumental hauek ostean foruma egingo da. Dokumentalen egileak edota dokumentalak lantzen duen gaiaren inguruko adituak gonbidatuko dituzte natur kontserbazioaren inguruko eztabaidak sustatzeko entzuleen artean. Naturaz gozatu eta egun natur kontserbazioak dituen erronkez aritu nahi dute, plaza zabalean, adituen eta herritarren arteko parte-hartzearekin.

Lehen dokumentala, 'Aralar, mundua leku den lurra', otsailean eskaini zuten eta izan zuen arrakasta ikusteak ilusioz bete ditu Arkamurkako kideak. Datorren asteartean 'Kantaurialdea' dokumentala eskainiko dute eta ondoren gure lurraldean berezkoa den, baian nekez manten- tzen ari garen bioaniztasunaz hitz egiteko aukera izango da. Apirilean 'Barbacana' dokumentala eskainiko dute eta ondoren giza jardueren ondorioz natur kontserbazioak gurean dituen mugak aztertuko dira. Natur ondarearen eta bioaniztasunaren mugak zeintzuk diren zehaztu eta horiez hausnartuko dute bertaratzen direnak.

Maiatzean, aldiz, uda aurreko azken dokumentala ikusteko aukera izango da, 'Lurraren bidean:Euskal Herriko arroketan idatzitako historia'. Uda ondoren, irailean, aldaketa klimatikoaren gaiari helduko diote 'Chasing ice' dokumentalaren bidez.

Gainera aurtengo 40. Natur Astean gai hau landuko dute eta dokumentalarekin emango diote hasiera.

Natur dokumentaldia ekimen berezia izango da aurten, baina urteroko egitarauarekin ere jarraituko du Arkamurkak. Horrela, datorren astean hasi eta apirilak 2, 3 eta 4 bitartean XXI. Astronomia Astea ospatuko dute. Urriaren azken astean, berriz, lehen aipaturiko XL. Natur Astea. Eta bitartean, hainbat irteera eta hitzaldi aurreikusten dituzte. «Aurtengo urtea oparoa izatea espero dugu eta herritar guztiak gonbidatzen zaituztegu gure ekitaldietan parte har- tzera, gurekin batera natura ezagutu eta naturaz gozatzeko. Gustu handiz gonbidatzen zaituztegu».