XXII. Salbatore pilota txapelketa prest, ohiko hiru mailetan banatuta

Dena prest. Pilota txapelketako aurkezpena frontoian. / AMAXKAR
Dena prest. Pilota txapelketako aurkezpena frontoian. / AMAXKAR

Maiatzak 6an hasiko da eta abuztuko Salbatore jaietan ospatuko dira finalak, abuztuak 6an

JUAN MARI ZUBIAURRE GETARIA.

Salbatore pilota txapelketaren edizio berri bat hastear dago. Gure Txeruko pilota ataleko ordezkariek aurkeztu dute, ohiko hiru mailetan banatuta: kadeteak, jubenilak eta 22 urte azpikoak. 2019ko txapelketa honek XXII. edizioa beteko du.

Denera 89 bikotek eman dute izena eta lehiaketa maiatzak 6an hasiko da, abuztuko Salbatore jaietan amaitzeko. Hiru mailetako finalak 6an izango dira. Partidak astelehen, asteazken eta larunbatetan jokatuko dira. Bikoteak jatorri oso ezberdinekoak dira, Euskal Herriko hainbat bazterretatik datozenak eta baita Errioxatik ere.

Jubenil mailan getariar bikotea izango dugu, Eizagirre eta Olaskoagak osatzen dutena. 22urte azpikoen mailan ere ordezkaritza izango du Getariak, Aristi eta Zenekortarekin. Kadete mailan 27 bikote egongo dira, jubenil mailan 29 bikote eta 22 urte azpikoen mailan 33 bikote.