Usurbilgo eztanda kulturalean barrena

Zumetaren horma irudia eta Laboaren omenezko eskultura/Felix Ibargutxi
Zumetaren horma irudia eta Laboaren omenezko eskultura / Felix Ibargutxi

'Harria hitz' bisita gidatua egingo dute udalerriko elementu arkitektonikoetan zehar, larunbatean, maiatzak 4. Ismael Manterola EHUko Artearen Historiako irakasleak emango ditu azalpenak

El Diario Vasco
EL DIARIO VASCODonostia

'Harria hitz' bisita gidatuak Usurbilgo elementu arkitektonikoek 60ko hamarkadako euskarazko eztanda kulturala nola islatzen duten aztertuko du larunbatean, maiatzak 4. Ismael Manterola EHUko Artearen Historiako irakasleak emango ditu azalpenak.

Ibilbideak herriguneko zenbait elementutan egingo du geldialdi informatiboa. Besteak beste, Dema Plaza, Udarregi bertsolariaren omenezko eskultura, Jose Luis Zumetaren murala, Mikel Laboa Plaza, Alejandro Tapiaren murala, Askatasuna Plaza eta Sagardoaren Monumentua ikusi eta aztertzeko aukera izango da.

Leku horien bidez, udalerriko alderdirik esanguratsuenak ezagutarazi nahi dituzte, hala nola sagardo produkzioa, Artze anaiak, Tapia, Mikel Laboa eta Zumeta artistak, edota gizon proba. Goizeko 10:00etan, Usurbilgo frontoian ekingo diote egitarauari, eta 11:00etan bukatzea dago aurreikusita.

Usurbilek euskal kultura garaikidearen susperraldian jokatutako papera ezagutaraztea helburu, Manterola bisita gidariak bere ikerketetan jorratutako ildo nagusien berri emango die parte hartzaileei. Euskal arte moderno eta garaikidearen inguruan biltzen dira bere lanak.

Ismael Manterola Ispizua (Zumaia, 1966) Artearen Historiako irakaslea da EHUko Arte Ederren Fakultatean. 2006an publikatutako 'Hermes y los pintores vascos de su tiempo' tesiarekin lortu zuen doktoregoa, eta egun irakaskuntza eta ikerketa komunikabideekin kolaborazioan uztartzen ditu.

Azalpen guztiak euskaraz izango dira. Sarrerak doan izan arren, parte hartzeko izena ematea ezinbestekoa da 688 818 017 telefono zenbakira deituz edo info@kultour.pro helbide elektronikora idatziz. Guztira, 25 pertsonentzako lekua egongo da.

Temas

Euskera