Usurbil ere Kopako finalean izango da

Real Sociedad taldeko autobusa Usurbilen izan zen atzo. Aste honetan zehar Gipuzkoako herri desberdinetatik pasatzen ari dira herri bakoitzeko bandera jasotzen eta atzokoan Beñat Larrañaga zinegotziak eman zien herriko bandera herriaren izenean eta Realaren bandera jaso zuen aldi berean.

Izan ere, laster jokatuko den Athletic-en aurkako Kopako finalean ez da zalerik egongo harmailetan, baina Realak ez du bakarrik egon nahi Sevillan. Jasotzen ari diren eta Sevillara joango diren gure zaleek idatzitako mezu ugariez gain, Gipuzkoa eta bere herriak Sevillan ere ordezkatuta egongo dira, partidaren aurreko orduetan taldeak bere jende guztia hurbil senti dezan.

Aste honetan zehar, Realaren autobus ofiziala gure lurraldeko herrietatik dabil herri bakoitzeko bandera jasotzeko eta Sevillara joateko, partidaren aurreko orduetan taldeari 'laguntzeko'.

Real Sociedad taldearen esanetan, Reala Reala bada, neurri handi batean, hitzartutako klubei esker da. Egindako lan bikaina eskertzeko, klubarekin lotura duten 89 klubei, Usurbil Futbol Taldea barne, finala ospatzeko bandera emango zaie. «Gipuzkoa, hitzartutako klubak... denok osatzen dugu familia txuri urdin handia eta elkarrekin bizi nahi dugu final handi hau».