Txirikorda prozesuaren azken saioa, bihar egingo da Sutegin

J.A. USURBIL.

Txirikorda belaunaldiarteko etxebizitza komunitarioaren proiektua osatzeko hilabeteotan garatu duten prozesua amaitzear da. Bihar egingo da azken saioa eta han aurkeztuko dira prozesuak utzi dituen ondorio nagusiak eta hirigintza-proiektua ere. Parte-hartze prozesuan parte hartu dutenei zein parte hartu ez dutenei egiten zaie bertaratzeko deia. Aurkezpena Sutegin izango da, bihar, 12.30etan. Era berean, proiektuaren eduki nagusiekin erakusketa bat ere jarriko da.

Xabier Arregi alkateak urte hasieran eman zuen prentsaurrekoan esandakoaren arabera, Ugartondoko urbanizazio berrian udalak eskuratuko duen eraikin publikoan belaunaldiarteko etxebizitza komunitarioa sustatuko du udalak. Herriko gazte eta adinekoei zuzendutako bizigunea izango da: emantzipatu nahi duten gazteak eta konpainian beren neurriko apartamentua nahi duten edadekoak izango dira erabiltzaileak.

Bost lan-saio aurreikusi ziren, eduki guztiak zehazteko. Izan ere, udalaren ustez, emaitza bera bezain garrantzitsua da egiten den bidea. «Bidea era kolektiboan egin nahi dugu. Era kolektiboan eraiki, era kolektiboan bizitzeko». Proiektua berritzailea da guztiz, mota honetako etxebizitza proiekturik ez baitago Euskal Herrian.

Udalak ondorioztatu du ekipamendu publikoak emantzipatu nahi duten gazteei eta konpainian beren neurriko apartamentua nahi duten edadekoei, biei, erantzun diezaiekeela. «Bi behar horiei erantzun bateratua eman nahi diegu». Gainera, alkatearen esanetan, bi kolektibo horiek bateratzeak badu indar gehigarri bat. «Gazteen eta edadekoen bizikidetza aberasgarria da bi kolektiboentzat. Nire eskuek adierazten duten bezala, txirikordatu egiten dira, eta horrela, indartu». Hortik dator proiektuari eman zaion izena: Txirikorda.