San Silbestre krosarekin agur esan zioten 2018. urteari Usurbilen

Ohikoa den bezala, ez zen lasterketa lehiakorra izan./
Ohikoa den bezala, ez zen lasterketa lehiakorra izan.

JOSU ARANBERRI USURBIL.

Herritar ugari bildu ziren astelehen arratsaldean 2018. urtea korrika egiten agurtzera. Izan ere, beste urte batez urteari amaiera polita emateko aukera izan zuten herritarrek eta 2018. urteko azken egunean kirolak bere protagonismoa hartu zuen usurbilgo herrian.

Hurbilago Usurbilgo Merkatari eta Ostalarien Elkarteak antolatuta San Silbestre krosaren 9. edizioa jokatu zen, eta herriko kaleetan zehar korrika egitera adin guztietako jendea animatu zen beste behin ere.

Ohikoa den bezala, ez zen lasterketa lehiakorra izan. Dortsalik gabe irten ziren korrika bertan izan ziren lasterkariak. Hotzari aurre eginez, korrika egiteko giro aparta izan zen.

Herriko pilotaleku inguruan izan zuten hitzordua 17:00etan, eta ordurako frontoi ingurua herritarrez bete zen. Azken urteetan bezala, txikienak aurrean zirela irten zen proba. Hauek ez zuten kaxko inguruan 4 kilometro inguruko ibilbidea osatu beharrik, itzuli bat emanda nahikoa baitzuten. Hala ere, beraiek izan ziren proba osoa egin zutenak ere.

Gainontzekoak, batzuk azkarrago, besteak mantsoxeago jai giroan egin zuten berriz ere frontoian amaitu zen proba. Mozorrotuta korri egitera ere animatu ziren batzuk, eta buruhandi bat ere lasterka ikusi genuen, nahiz eta oraingoan ez umeen atzetik.

Ez zen irabazlerik izan, baino parte hartzaileetako asko Hurbilago elkarteak egindako zozketetako opariekin itzuli ziren etxera.

Opariak

Izan ere, Hurbilago elkarteko komertzio, taberna eta bestelakoek jarritako opari ugari izan ziren lasterkarientzat. Urteberria iristearekin batera, bestelako festa izan zen kaxkoan.

Aros DJ-a izan zen Askatasuna plazan musika jartzeaz arduratu zena eta herriko tabernetan ere giro paregabea izan zen 2019. urteari behar bezalako ongi etorria eman asmoz.