Orio

Saharako Festa larunbat honetan egingo da

Saharako Errepublika Arabiar Demokratikoa aldarrikatu zutela 50 urte beteko dira otsailaren 27an eta, GueraraOrio elkarteko kideen ekimenez, Sahararen Festa egingo dute larunbat honetan, otsailak 15.

12:00etan ikurrina eta Sahararen bandera eskegiko dituzte udaletxeko balkoian, eta sahararren irrintzi berezia botako dute, festari hasiera emateko. 12:30etik aurrera, zuzeneko musika izango da Herriko Plazan, jatorri sahararra duen musika-talde baten eskutik. Bitartean, parrillan egindako haragi-pintxoak eta pastak jateko aukera izango da plazan instalatuko den haiman; haragi-pintxoak 6 euroan eta pastak euro 1ean.

Horrez gain, aldarrikapenaren urteurrenari lotutako manifestua irakurriko dute elkarteko kideek, eta bildutako dirua Saharako kanpamentuetara helaraziko dute, janariaz gain, horixe baita hango herritarrek uneotan gehien behar dutena.

Sahararrei elkartasuna adierazteko modu gehiago ere badira eta horretan urteak daramate herriko bi ikastetxeak. Ikastolak aurten ere Saharako errefuxiatuen kanpamenduetarako elikagai kopuru handia bildu du. Gogor egin dute lan LH6ko ikasleek, lehenengo dokumentazioa sortu, gero gelaz- gela Sahara herrialdearen berri eman eta, azkenik, janari bilketaren jarraipena eta ardura nagusia hartu. Kaxak ondo antolatu eta bete ondoren, herriko lokalera eraman dituzte handik banaketa abia dadin. Oso pozik agertu dira LH6ko ikasleak kanpainak emandako fruituarekin eta eskerrak eman nahi dizkiote Orioko Herri Ikastolako komunitate guztiari.

Era berean, Zaragueta Herri Eskolak ere Sahararen aldeko kanpaina burutu du. Denetarik jaso dute: arroza, babarrunak, dilistak, pasta, atun latak, azukrea, botikak... Eskolako ikasle beraiek arduratu dira jasoketaz.