Orio

'Ostirala iritsi da', gaur Karela kiroldegian

Orioko Ikastolak antolatuta, 'Ostirala iritsi da' ikuskizuna aurkeztuko dute gaur arratsaldean, 17:00etatik aurrera Karela kiroldegian, Porrotx eta Marimotots pailazoek, beraien laguntzaileekin batera. Ikuskizuna 70 minutukoa izango da, eta bertan, Porrotx, Marimotots, Pupu, Lore eta bertaratutako lagunek Txapas irakaslearekin batera, bere azken laneguna igaroko dute, elkarrekin ikasitakoa ospatuz. Basoa, jolasak, eskulanak, kantuak, irriak eta bihurrikeriak ez dira faltako. Txapasekin beti da ostirala!

«Jantzi sudur gorria eta zatoz gurekin Txapasen kaxa magikoek gordetzen dituzten sekretuak ezagutzera», diote antzezleek: Porrotx (Joxemari Agirretxe); Marimotots (Mertxe Rodriguez); Pupu (Izaskun Forcada); Lore (Joanes Echeveste) eta Txapas (Oihana Sanchez). Musika, Xabier Zabalaren eskutik izango da.