Orio

Orio, hirugarren Castron, Oihan Manterolaren debutean patroi gisa lehen traineruarekin

Orio Arrraunketa Elkarteak hirugarren amaitu zuen igande goizean Castro Urdialeseko uretan ospatu zen estropadan. Orioko lehen trainerua hirugarren sailkatu zen eta 'B' ontziak hamargarren postuan amaitu zuen, Urdaibaik dominatu zuen estropadan, bigarren Zierbena sailkatu zen bitartean.

Oraindik goiz da ondorioak ateratzeko, baina garbi dago bi ontzi bizkaitarrek arerio gogorra izango dutela, Iker Zabalak entrenatzen duen trainerua. Gogoratu, Bermeoko trainerua aurten Jon Salsamendik entrenatzen duela, eta nahiz eta Zabala entrenatzaile egon, Gorka Aranberri eta beste arraunlari batzuen bajak izan, ondo indartu dela fitxaketekin. Dirudienez, aipatutako hiru ontziek, Donostiarra eta Hondarribirekin batera, lehia gogorra izango dute aurtengo denboraldian.

Castroko estropadan, aipatzekoa da 17 urteko Oihan Manterola Laskibar 'Baxarrik' debutatu zuela patroi bezala traineru nagusian. Debutean ez zuen erronka makala, 24 minutuko proba, erdia baino gehiago itsasoan. Gainera, itsasaldi oso nahastua zegoen, baina ongi burutu zuen lehenengo estropada.

'Baxarrik' zortzikoan egin zuen arraun, baina aurreko urteetan bateletan patroi bezala ibilitakoa da. Seniorrekin patroi bezala hastea erabaki dute, eta entrenamenduetan bi traineruekin ibiltzen da. Adibidez, Orioko Jaitsieran, B taldearekin ikusi genuen, eta igandean lehen aldiz traineru nagusiarekin. Hirugarren patroi bezala Haritz Olasagasti 'Errota' ibiltzen da; hiruren artean osatuko dute denboraldia. Gorka lehen traineruan da, baina beste bi patroiak ere prest egotea komeni da edozein ezbehar gertatzen bada ere.