Orio

Haurrentzako filosofia-saioa, bihar Gaztelekuan

Jolasetik abiatuta, LH5 eta LH6 mailetako haurrei zuzendutako filosofia-saioak antolatu dituzte Jakinmin elkarteak eta Txurrumuski aisialdi taldeak, Udalaren laguntzarekin. Ordu eta erdiko saioak izango dira, eta arrakasta izanez gero, hilean behin antolatzeko asmoa dute. Lehen saioa, hain zuzen, bihar izango da, 17:00etan hasita, Gaztelekun.

Saioa Jakinmin praktika filosofikoen elkarteko kide batek bideratuko du, eta doan izango da. Antolatzaileek aditzera eman dutenez, «Haurrek, txiki-txikitatik, galderak egiten dizkiete helduei gai liluragarriren inguruan. Normalean, ez dute bidea bukatutzat ematen jasotako lehen erantzunarekin, eta denbora luzez ibiltzen dira galdera horiekin bueltaka. Jaiotzez dira filosofo». Egunerokoan ez da erraza izaten filosofiarako tarteak bilatzea, eta horregatik antolatu dituzte ondoko saioak. Izena emateko epea gaur bertan amaituko da.