Orio

Euskara praktikatu nahi dutenentzat, Mintzalagun programa

Badira euskara praktikatu nahi duten arren, horretarako zailtasunak dituzten herritarrak: lotsa ematen dietelako, inguruan inor ez dutelako... Pertsona horiei laguntzeko helburua du Mintzalagun egitasmoak eta izen-ematea zabalik dago.

AEK-k hiru edo lau pertsonako taldeak osatzen ditu eta, horietan, euskaraz ondo dakien bat eta praktikatu nahi dutenak biltzen dira. Taldeak astean behin elkartzen dira, ordubetez, euskaraz hitz egiteko gustuko jardueraren bat eginez. Denetik egiten dute: paseoa eman, kafea hartu, pintxo-potean ibili, mendira joan, erosketak egin...

Nor bere helburua lortzeko apuntatzen da Mintzalagun programan: euskaraz ondo dakienak laguntzaile-papera betetzen du eta praktikatu nahi duenak, berriz, aukera dauka lasai hitz egiteko gune euskaldun eroso batean.

Euskara praktikatzeko izena eman nahi dutenek, hiru bide dituzte: WhatsApp mezu bat bidaliz 625 485 215 telefonora edo urolakosta@aek.eus helbidera idatziz, edota Orioko euskaltegira hurbilduz, bertan beharrezko informazioa emango zaie. «Euskaraz ondo egiten baduzu eta praktikatu nahi dutenei lagundu nahi badiezu ere eman dezakezu izena. Astean ordubete eskaini beharko diozu, besterik ez», diote AEK-tik.