Keta Babyauto, berdinketaren errege, bukatzeko hiruna egin zuen Anaitasunarekin

Hamaikak bat. Taldeko jokalari guztiek izan dute garrantzia denboraldi luze honetan. /  AMAXKAR
Hamaikak bat. Taldeko jokalari guztiek izan dute garrantzia denboraldi luze honetan. / AMAXKAR

Gorengoen mailako liga amaitu dute getariarrek 14 berdinketekin, hautetatik 6 hiruna

JUAN MARI ZUBIAURRE GETARIA.

Getariako Keta Babyauto taldeak bukatu du denboraldia hasierako helburua beteta, hau da, Gorengoen mailako bigarren multzoan mantentzea. Azken partidan hiruna amaitu zuten Txerloian, Azkoitian jokatutako partidan. Anaitasuna sailkapeneko atzealdean dagoen taldea zen eta gogoz ekin zioten Babyautoko mutilek.

Azken aldian bezala, partida eroa izan zen markagailuari begira. Aurretik jarri ziren getariarrak Ander Lazkanoren golarekin baina azkoitiarrek berdindu egingo zuten ondoren. Anderrek berak egin zuen berriz gola atsedenaldira abantailarekin joateko.

Bigarren zatian, etxekoek asmatu zuten Julen Azpeitiaren ate aurrean eta markagailua irauli zuten. Emaitzarekin ezin konforme egon eta erasora jo zuten ketakoak Patxi Berasaluzek berdinketaren gola egin arte.

Harrigarria da baina liga amaitzeko ere berdinketa berria Keta Babyautorentzat. Denera 14 lortu dituzte eta oraindik bitxiagoa dena, hauetatik sei partida hiruna amaitu dituzte. Ez da erraza izango edozein mailatara jo eta liga batean sei partida hirunako emaitzarekin bukatu duen talderen bat aurkitzea. Badu bere meritua datu horrek eta oraindik bereziagoa da emaitza hori (3-3) bost aldiz etxetik kanpo lortu duela. Golak egiteko erraztasuna erakutsi dute beraz Iñaki Azpitarteren mutilek eta datorren denboraldiari begira atzealdean sendoago azaltzen badira eta golak egiteko gaitasun berbera mantentzen badute, sailkapenean gorakada nabarmena egin dezakete.