Ixidro Deunaren jaiek Mian jarraitzen dute gaur eta bihar

Omenduak. Inaxi Zulaika eta Joxe Mari Esnal, Artelatz elkarteko atarian oroigarriak jasota. /  AMAXKAR
Omenduak. Inaxi Zulaika eta Joxe Mari Esnal, Artelatz elkarteko atarian oroigarriak jasota. / AMAXKAR

Festen egitarauko azken bi egunetan ekimen ugari izango dira oraindik | Asteazkena izan zen Ixidro Deunaren eguna baina jaiak asteburura luzatu dituzte

JUAN MARI ZUBAIUERRE GETARIA.

Mian Ixidro Deunaren jaiak jarraipena izango dute asteburuan, gaur eta bihar. Asteazkena, maiatzak 15, izan zen Ixidro Deunaren eguna eta bikain ospatu zuten bertaratutako denek, eguraldi zoragarria lagun zutela.

Baina aste eguna izanik, festak antolatzen dituztenek astebururako ere egitarau oparoa prestatu dute Atzo gauean bertso-afari antolatu zen Artelatz elkartean. Bertan, Julio Soto eta Amets Arzallus bertsolariak izan ziren gonbidatuak bertsoak kantatzeko. Ondoren, gazteen eskutik musika eta festa aspertu arte iragartzen zuten antolatzaileek.

Gaur eta bihar festa

Gaur, larunbata, arratsaldeko 17:00etan hasiko da eguneko egitaraua. Ume jolasak, puzgarriak (eguraldi ona bada) eta goxokiak txikienentzat prest izango dira. 17.30ean toka txapelketa iragarri dute eta gaueko 21:00etan gazte eta helduen afaria, Azkue jatetxean. Ondoren, 23:00ak inguruan hasita, Ansorregi eta Larrañagarekin erromeria. Indarrak berritzeko goizaldera, txokolate beroa.

Bihar igandea festen azken eguna ospatuko dute Mian. Eguerdiko 12:00etan patata tortilla lehiaketa izango da. Bertan parte hartu ahal izateko baldintza hauek bete beharko dira; bikotekide batek elkartekoa edo getariarra izan behar du. Etxetik ekarritako patata tortilla 12:00etatik 12:30etara aurkeztu beharko da. Derrigorrezko osagaiak hauek izango ditu patata tortillak, sei arraultza eta patatak. Gainerako osagaiak bakoitzaren gustuaren araberakoak. Dastaketaren erabakia meza ondoren hartuko da aurkeztutako torillak bertan bazkaltzeko erabiliko dira gero.

Eguerdiko 12:30ean meza ospatuko da auzoko ermitan. 13:30ean Joxe Felix Zubizarreta eta bere motozerraren erakustaldia ikusteko parada izango dute bertaratutakoek eta jarraian, sagardoa eta txerriki errea nahi adina. Arratsaldeko 17:30ean Mus Txapelketa irekia, Artelatz elkartean eta ondoren, festen amaierako suziria botako dute.

Omenaldiak

Asteazkenera itzuliaz, Ixidro Deunaren eguneko egitarauaren barne, aurten 65 urte bete dituzten Inaxi Zulaika eta Joxe Mari Esnal omendu zituzten auzokideak. Biek jaso zituzten oroigarriak Nika Lertxundi alkatearen eta Artelatz elkarteko ordezkarien eskutik.