Iturzaeta Herri Eskolak ikasturte berria abian du 230 ikaslerekin

Zuzendaritza. Ane Zubia, Nagore Etxabe eta Monika Aranburu./
Zuzendaritza. Ane Zubia, Nagore Etxabe eta Monika Aranburu.

Zuzendaritzan aurpegi berriak izango dira

JUAN MARI ZUBIAURRE GETARIA.

Iturzaeta Herri Eskolako ikasleek atzo eman zioten hasiera 2018-2019 ikasturteari. Udarako oporrak amaitu zaizkie eta denetarik ikusten zen atzo goizean Iturzaetako sarreran. Batzuk pozik berriro lagunak ikusten zituztelako, udarako abenturak kontatzeko irrikan eta beste batzuk triste, oporraldia nahi baino laburragoa egin zaielako. Malko bat edo beste bota zutenak ere ikusten ziren Eskolako atarian. Aurtengo ikasturteari begira berrikuntzak izango dira Iturzaeta Herri Eskolan. Zuzendaritzan adibidez, talde berria izango du ikastetxeak, Nagore Etxabe zuzendaria izango da, Ane Zubia ikasketa buru bezala egongo da eta Monika Aranburu idazkari lanetan arituko da.

Ikasturte honetan 239 ikasle izango ditu Iturzaeta Herri Eskolak, horietatik 104 Haur Hezkuntzan eta 135 Lehen Hezkuntzan.

Honela banatuta geratuko dira maila ezberdinak. Bi urtekoen gelan 23 haur matrikulatu dira, eta, beraz, bi gela osatu dituzte. Hiru urtekoen gela bakarra izango da, eta lau eta bost urtekoen mailetan berriz, bina gela. Lehen Hezkuntzari dagokionez, LH1 eta LH3n bina gela egongo dira eta LH2, LH4, LH5 eta LH6an bana gela izango dira 2018/19 ikasturte hasiberrian.

Lehenengo egunetan goizez ibiliko dira haurrak, aldaketa handia izaten baita oporralditik eskolara joatea. Atzo goizeko 09:00etatik arratsaldeko 13:00etara egon ziren eta datorren astean ordutegi berbera izango dute lehen hiru egunetan, astelehen, astearte eta asteazkenean. Ostegunean, hilaren 13tik aurrera, goiz eta arratsaldez hasiko dira. Jangela zerbitzua berriz, astelehenean, hilaren 10ean, hasiko da.

Eskerrak laguntzagatik

Kurtso hasiera honetan, Iturzaeta Herri Eskolako zuzendaritzak, klaustroa osatzen duten irakasle guztien izenean, eskerrak eman nahi dizkie aurreko ikasturtea bukatu ondoren auzo-lanean herri eskola margo- tzen eta apaintzen jardun zuten guztiei. «Deialdia egin genuen eta erantzun ezin hobea jaso genuen. Hasiera batean HHko lau gela margotzea zen gure helburua, baina uste baino jende gehiago bildu ginen eta sarrera ere egin genuen. Eskerrik asko guztiei» adierazi dute zuzendaritzatik. Lan hauekin batera, sarreran, familientzako gune bat ere jarri dute, gurasoek erabili dezaten harrera aldian, bileretarako zain daudenean... herriko eskolan.

Contenido Patrocinado

Fotos

Vídeos