Ate irekien jardunaldia eta hitzaldiak prestatu dira Museoen Nazioarteko Egunari begira

Sarrera. Larunbatean ordaindu gabe sartzeko aukera. /  AMAXKAR
Sarrera. Larunbatean ordaindu gabe sartzeko aukera. / AMAXKAR

Datorren larunbatean museoko sarrera doakoa izango da eta hainbat ekintza egingo dira

J. M. ZUBIAURRE GETARIA.

Museoen Nazioarteko Egunari begira, maiatzak 18an, datorren larunbatean, Cristóbal Balenciaga Museoak ate irekien jardunaldi bat eta jendeari irekitako hitzaldi bat planteatzen ditu. Hitzaldia aurtengo gaian oinarrituta dago; izan ere, 'Museoak, kultur ardatz gisa: tradizioaren etorkizuna' lelopean, museoek beren komunitateetan eragile aktibo gisa duten zeregin berrian oinarrituko da. Museorako sarrera doakoa izango da egun guztian.

Hitzaldiaren xedea da museoek beren komunitateetan eragile aktibo gisa duten zereginari buruzko gogoeta egitea. Era berean, museoko esferen, komunitateen eta modaren artean gaur egun gertatzen ari diren elkarrekintzei buruzko ikuspegi orokorra ere eman nahi du, betiere, egungo zenbait esperientziaren azterketaren bitartez eta nazioarteko hiru hizlariren ikuspegietatik abiatuta.

Egun berezi honetarako prestatu duten egitaraua goizeko 10:00etan hasiko da Museoko zuzendari Miren Vivesen sarrerakoarekin. 10:10ean 'Amy de la Haye Pasio baten jomugak: modaren, komunitatearen eta museoaren oinarriak' gaia jorratuko da. 11:00etan, Igor Uria 'Cristóbal Balenciaga Museoaren Bilduma: Ondaretik sorkuntza berrira' gaiaz mintzatuko da.

11:45ean kaferako etenaldia egingo dute eta 12:15ean Judith Clark Elkarrizketak Museoarekin hitzaldiaren txanda izango da. 13:00etan bisita egingo da 'Cristóbal Balenciaga, Moda eta Ondarea. Testuinguruak' erakusketara.

Sarrera irekia izango da leku-kopurua bete arte. Izena aurretiaz eman behar da, 943008840 telefono zenbakira deituz edo info@cristobalbalenciagamuseoa.com posta elektronikora idatziz.