Ibon Gereka: «Garrantzitsua da inplikatuta dauden agente guztien partaidetza»

Ibon Gereka. Onartu den ordenantza aurrean duela./AMAXKAR
Ibon Gereka. Onartu den ordenantza aurrean duela. / AMAXKAR

Ibon Gereka oso pozik azaldu da herritarren partaidetza azpimarratzerakoan eta azken ondorioa ordenantza berri bat izan da

JUAN MARI ZUBIAURREGETARIA.

Espazio publikoaren erabilera arautuko duen ordenan-tza ahobatez onartu berri du Udalak. Parte-hartze prozesu baten emaitza izan da eta partaidetza zinegotziak azaldu digu prozesu honen ibilbidea. Azken emaitzaren berri emango digu elkarrizketa honetan.

-Ze asmorekin ekin zenioten espazio publikoak arautuko dituen ordenantza abian jartzean?

-Legealdi hau hasi genuenean ikusi genuen kaleak transito aldetik egoera txarrean zeudela. Herriak kanpoko jende asko erakartzen du eta bertako negozioak ere gora egin dutela nabarmena zen. Horren aurrean batez ere terrazen erabilera asko handitu dela eta horrek nolabait elkarbizitzarako arazo batzuk sor ditzakeela. Horregatik espazio publikoaren erabielra arautu behar zela ikusi eta aurrera egin genuen.

-Ordenantza egiteari ekin zenioten?

-Bai eta gainera garbi geneukan hau gauzatzeko oso baliagarria izango zela bertan inplikatuta zeuden agente guztien partaidetza. Beti gure jarduera politikoan parte-hartzea bul- tzatu dugu eta gai honetan gainera denen ikuspuntua ezagutzea fun- tsezkoa zela ikusten genuen. Espazio publikoaren erabileraren inguruan denen ekarpenak kontutan eduki nahi genituen eta hori da egin duguna.

-Zeintzuk ziren parte hartuko zuten agenteak?

-Alde batetik bizilagunak, herritarrak, eta bestetik ostalaritza eta merkataritza. Lehen deialdi bat egin genuen denon artean arazoak identifikatzeko. Hau hiru bileretan gauzatu zen. Behin identifikatuta, beste bilera ireki batean ordenantza berrian joan beharko luketen irizpide nagusienak idatziz jarri ziren. Hau izan zen ariketa konplikatuena baina behin irizpideak adostuta eragile guztien artean, udal gobernutik sukalde lana egin genuen eta lehen borradore bat osatu zen. Hau ondoren bilera irekian berriz denei azaldu zitzaien eta bertan ikusi zuten hasierako irizpide nagusiak betetzen zituela eta orduan borradorea berretsi egin zuten. Hori izan da eskeleto nagusia eta oposizioarekin batera ordenantza osatu genuen jarraian. Behin behineko onarpena jaso ondoren alegazioak izan ziren, asko, eta gehienak ontzat eman ditugu, batez ere enbor nagusiaren irizpideak ez dituztelako hausten. Barneratu ondoren azken plenoan aho batez onartua geratu zen ordenantza. Garrantzitsua da hau, zeren elkarbizitzarako egindako arau bat izanik denen adostasuna ezinbestekoa bai da eta hori azpimarratu nahiko nuke.

-Parte-hartzearekin gustura zaudete?

-Bai. Honelako prozesu bat abiatzean zalantzak izaten dituzu nolako erantzuna jasoko duen jakin bitartean. Baina jende asko etorri da, denak ekarpenak egiteko prest eta horrek erakusten du baita ere hutsune bat bazegoela lege aldetik eta denon artean bete dugula. Gainera zilegitasun handiagoa du askoren artean egindako zerbait denean.

-Ordenantzaren arau nagusiak zeintzuk lirateke?

-Beno, garbi geratu zena pasalekua izatea bermatu behar dela beti eta hori nolabait metrotara pasa dugu. Espazio bat bermatu behar da beti joan-etorriak egin ahal izateko. Hortik abiatuta ostalaritza edo merkataritzako negozio bakoitzak bere espazioa izango du terrazak edo produktuak kalean jarri ahal izateko. Eremu mugatu bat du bakoitzak eta hori errespetatu egin beharko da. Espazioaren arauak lehen atal bat osatzen zuen eta bigarren bat ordutegiena zen. Getarian zorionez gaueko arazo gehiegirik ez daukagu baina ala eta guztiz dena araututa geratu da. Jendearen deskantsua bermatu beharra zegoen eta hori kontutan izan da. Alegazioak gai honen inguruan izan ditugu eta batzuk onartu dira eta besteak ez. Hirugarren atal bat ere jorratu dugu, estetikaren ingurukoa. Ordenantzan lehen irizpide batzuk ezarri dira gai honetan baina datorren urtean manual estetiko bat eratzeko asmoa dago eta han zehaztuko dira hobeto gauza guztiak, itxurari dagozkionak. Arau guzti hauek betetzen ez direnean noski zigorrak ere ezarriko dira. Aurrerantzean negozio bakoitzak eskaera berri bat egin beharko du, non planoan ikusiko den bakoitzak duen eremua. Laster egin beharko dute hori eta jakitera emango zaie noiz hasi daiteken. Udaran dena prest izan arren atzeratzea erabaki genuen urte garai hau egokiagoa zela ikusiaz.

 

Fotos

Vídeos