«Herritar guztientzat eta herriarentzat lan egiteko prest gaude»

Atzo goizeko 9:00etan eman zitzaion hasiera legealdi berriko lehen udalbatzarrari. Adin mahaia eta Orioko udalbatzarra eratu eta gero, datozen lau urteetarako alkatea aukeratu zen. Ainara Munduate, Xabier Ibarguren, Beñat Solaberrieta, Bakartxo Oliden eta Bittor Andresen babesarekin, Anuska Esnal Oliden izango da Orioko alkatea. Sei bozka jaso zituen, Lourdes Salsamendik bere taldeko bost bozka jasotzen zituen bitartean. PSE eta Orain alderdiek abstenitzea eta boto zuria eman zituzten, eta ondorioz, Anuskak jaso zuen 'makila' José Ángel Zalduaren eskutik.

Erantzukizuna eta ardura nabarmendu zituen Esnalek bere lehen hitzetan: «Errespetuz, herritar guztientzat eta herriarentzat lan egiteko prest gaude. Esperientzia eta balio askoko taldea delakoa gurea. Horregatik, uneoro aipatu dugun elkarlanerako zubiak eraikitzen jarraituko dugu guztiekin, parte hartzea sustatuz eta herritik eraginez. Denontzako dagoelako lekua, denok egon behar dugulako».

Pasa den maiatzaren 26ko hauteskundeetan, 1.257 bozka eta sei zinegotzi lortuta, lehen indarra izatea lortu zuen EH Bildu Oriok eta atzotik, Anuska alkate.