Hamar urte beteta ere, hazten jarraitzen du Ekainberrik

Ekainberriko aretoetako irudia/Michelena
Ekainberriko aretoetako irudia / Michelena

Azken uda honetan, esaterako, %12,25eko igoera izan du bisitari kopuruan. 2008ko irailaren 11tik, bestalde, 302.542 pertsonak ezagutu dute Gizateriaren Ondare diren Ekain kobazuloko margoak

Hamarkada bat igaro da Ekainberrik bere ateak ireki zituenetik, eta bisitarien hazkundea nabari dute oraindik. Azken uda honetan, esaterako, %12,25ko igoera izan du bisitari kopuruan. 2008ko irailaren 11tik, bestalde, 302.542 pertsonek ezagutu dute Gizateriaren Ondare diren Ekain kobazuloko margoak.

Zestoako kultur baliabidearen datuek gora egin dute, «aurtengo eguraldiak, eskaintzaren aniztasunak eta berrikuntzek lagunduta», museoko kudeatzaileek ohar bidez jakinarazi dutenez. Uztaila eta abuztuan, adibidez, 6.514 bisitari izan dira Zestoako Sastarrain bailaran Ekainberri eta Lili Jauregia bisitatzen. Lili Jauregiko 'Lilitarren ohorea' antzeztutako bisita 646 bisitarik ikusi ahal izan dute. Ekainberrin, aldiz, aurtengo 5.074 bisitariekin, %12.25eko hazkundea izan da, «oso igoera garrantzitsua».

Ekainberrik uda honetan bertara hurbildu diren bisitariei Historiaurrea bere osotasunean bizitzeko aukerak zabaldu egin dizkie UNESCOk Gizateriaren Ondare izendatutako margoen bidez. Udan zehar bisitariek 'Ekain Abentura' esperientziaren bitartez orain dela 14.000 urteko gizakiek nola margotzen zuten, sua nola egiten zuten eta nola ehizatzen zuten ikasteko aukera izan dute, eta esperientzia hau zabaltzeko gune berria sortu zen aurtengo udan: Historiaurreko kanpalekua.

Gune berri honetan, bisitariek tailerrean ikusi eta ikasitakoa frogatzeko aukera izan dute: margoekin bere labar artea sortzeko gunea, historiaurreko teknikekin sua egiteko txokoa eta beraien ehiza abilezia frogatzeko azagaia eta bultzagailuak erabiltzeko ehiza ibilbidearekin.

Eremu berriak, alderdi ezezagunak

Udan martxan egon den eremu berri honetan, Ekainberritik pasa diren bisitariek Historiaurreko gizakien bizimoduaren alderdi ezezagunak ezagutu ahal izan dituzte, izan ere, artelanak sortzeaz gain, gizaki haiek txabolak egin, ehizatu eta jan egin behar zuten, biziraupena bermatzeko. Bisitariak ere horretarako gai izango ote ziren frogatzeko aukera eskaini du Ekainberrik uda honetan zehar.

Aurten, gainera, pottokak izan dira Ekainberriko zelaian. Duela 14.000 urte, gaur egun Zestoa den inguru honetan zebiltzan zaldiak Przewalski arrazakoak (Equus ferus Przewaslki) ziren, labar margo askotan irudikatu zuten arraza da, guztien artean Ekaingo zaldien margoak gailenduz. Przewalski zaldia inoiz ez da etxekotua izan. Bere tamainagatik, Przewalski zaldia ponien multzoan sailkatu daiteke. Hala ere, espezialista askok aukera horri uko egin eta talde horretatik kanpo kokatzen dute.

Kobazuloan margotuta dauden zaldiak ez dira pottokak, baina beraien ondorengoak direla uler dezakegu, arraza berezi bat eta berariaz euskalduna dena.

'Lilitarren ohorea' antzezlana, bestalde, Zestoako Lili Jauregiko jatorrizko eszenatokian eta pertsonaia historikoekin egiten da, aktore baten dramatizazioarekin. Bakarrizketa batean, Jauregian bizi izan zen Lili leinuko azken kideak, Andre Madalenek, 1678. urtera eramaten ditu bisitariak, eta bidean etxeko gela eta aretoetan murgiltzen dira.

Aurtengo udan, asteartetik ostiralera arratsaldetan, larunbatetan goiz eta arratsaldez eta igande goizetan egin dira paseak eta guztira 646 bisitarik ikusi ahal izan dute Andre Madaleni gertatutakoa eta nola egin dion aurre.

Temas

Euskera

Contenido Patrocinado

Fotos

Vídeos