«Guztiona dena guztion parte hartzearekin eginaz Zestoa hobeagoa egin dezakegula sinesten jarraitzen dugu»

«Interes pribatuen gatibu baino filosofiaren gatibu hobe», dio EH Bilduk, jeltzaleen oharrari erantzunez

AINARA MARTINZESTOA.

Aurreko astean Zestoako EAJ-PNVk idatzi baten bidez zorrotz kritikatu zuen EH Bilduk kiroldegi berriaren inguruan egin duen planteamendua. EH Bilduk, oposizioak kiroldegiaren kudeaketaren inguruan kritikak egitea osasuntsutzat jotzen du, baina planteamenduari egin dizkioten kritikak ez dituzte zuzentzat jotzen eta onargarriak ez direla ere esan dute.

Harrigarritzat jo dute jeltzaleen jarrera, «aurreko gobernua EAJren esku egon zela kontutan hartuta, eta, ondorioz, baita kiroldegiko obren jarraipenaren arduera ere, harrigarria egiten zaigu iragan bi urteotan gobernu arduratik inolako planteamendurik egin ez eta orain berehala kudeaketa osoa kanpoko enpresen esku uztearen aldeko jarrerarekin agertu izana». EAJren kritika nagusia herritar eta auzotarrek jasoko duten zerbitzuaren egokitasunaren ingurukoa da. EH-Bilduk proposaturiko baliabideak «motz» gelditzen zirela hain zuzen ere. Honi erantzunez, nabarmendu dute garbiketa eta kirol kudeaketa lanpostu bat eta erdi gehitzea erabaki dutela. Azalpenak ere eskatu dizkiete jeltzaleei, «gutxienez zertan gelditu garen motz jakitea gustatuko litzaiguke, edo kirol ekipamendu berriaren kudeaketa publikoa lehenetsi izana da EAJrentzat motz gelditzea?».

Pribatizazioaren gaiari dagokionez, EH Bilduk azpimarratu du EAJk beste herrietako kudeaketen inguruan erabilitako zenbait datu ez direla zuzenak. «Baina horrela izanda ere, eta Zestoan ditugun ekipamendu publikoak eremu publikotik kudeatzea dela onena sinesten badugu, zergatik egin behar dugu Zestoan, beste herrietan EH Bilduk egin duena?», alderdikeriatik egindako argumentutzat jo dute. Pribatizazioa hauturik errezena dela onartu dute, baina ikuspegi demokratiko eta publiko batetik okerra. «Herritarrek bozka bidez ematen diguten ardura eta erantzukizuna zerbitzu publikoak pribatizatzeko erabiltzea arduragabekeria hutsa da». Adibide bezala aurreko legegintzaldian polemika sortu zuen argiteriaren kuadeaketaren gaia jarri dute.

Kiroldegiko langileen inguruan eta etorkizunera begira, «hiruzpalau urteko transizio epe batean kirol ekipamenduak kontrol publikotik ahalik eta ondoen kudeatzen saiatuko gara, horretarako lan poltsa publikoak erabiliaz». Aipaturiko prozesu guztia Kirol Mahaiaren ikuskaritzapenean gauzatuko da eta kirol eragileek parte hartze zuzena izango dute. Gaur egungo egoerari dagokionez, «dena dago egiteko eta zerotik hastera goaz, arazo askori aurre egin beharrean aurkitu gara eta aurrerantzean ere arazoak izango ditugula jakitun garen arren, guztiona dena guztion parte hartzearekin eginaz Zestoa hobeagoa egin dezakegula sinesten jarraitzen dugu».