Getaria

Jon Maiak herri identitatearen lana aurkeztu du Berdura Plazan

Herritar ugari bildu ziren Berdura Plazan joan den ostegunean Jon Maia, bertsolari eta idazle zumaiarrak, Getariako herri identitatearen inguruan egin berri duen lanaren ezaugarriak ezagutzeko asmoarekin. 2023ko abenduan, Getariako Udalak, Maiari Getariaren identitatearen narrazioa osatzeko lana enkargatu zion. Berak azken hilabeteetan herriko 23 eragile inguru eta 115 bat herritarrekin bildu da eta beraien iritziak biltzen egon da, herriaren diagnostiko edo erradiografia bat osatzeko helburuarekin. Herritar eta eragile horiengandik jasotakoarekin getariarren erretratu bat egin du eta ekitaldi honen bitartez, ateratako ondoriaok jakitera eman ditu. Jonen esanetan lan hau abiapuntu bat besterik ez da, aurrera begira zer egin erabakitzeko.