Elkano bera eta bere balentria ezagutzera emango du Fundazioak

Elkano Fundazioa. Uztailean aurkeztu zen udaletxeko batzar aretoan partaide guztiekin. /  AMAXKAR
Elkano Fundazioa. Uztailean aurkeztu zen udaletxeko batzar aretoan partaide guztiekin. / AMAXKAR

Hastear dagoen 2019an Elkano Fundazioak proiektu ezberdinak abiatuko ditu munduari lehenengo aldiz bira eman zioneko 500. urteurrena ospatzeko

JUAN MARI ZUBIAURRE GETARIA.

Juan SebastianElkano getariar mariñela bera, eta burutu zuen balentria ezagutzera eman nahi duten proiektuak koordina-tzeko sortu da Elkano Fundazioa. Erakunde hauek hartzen dute parte asmo honetan: Eusko Jaurlaritza, Gipuzkoako Foru Aldundia, Urola Kostako Udal Elkartea eta Getariako Udala.

2019an hasiko dira munduari lehenengo aldiz bira eman zitzaioneko 500. urteurrena ospatzeko ekitaldi ezberdinak. Fundazioak berak azaltzen du bere sorreraren arrazoia, «egun ezezaguna izaten jarraitzen duen historiako zati bat ezagutzera emateko sortu da fundazioa: munduaren inguruko lehen itzulia, Elkanok zuzendua, orain dela bost mende hain juxtu. Gizateriarentzat aldaketa garrantzitsuak ekarri zituen gertaera historiko hark hiru urteko iraupena izan zuen, eta euskaldunek, beste batzuekin batera, protagonismo handia izan zuten».

Fundazioak aldi baterako iraupena izango du, hain zuzen ere espedizioak izan zuen iraupen bera, eta helburu nagusi bat: herritarren jakin-nahia piztea gertakari garrantzitsu haiekiko eta gertakari horiek garaiko gizartean nahiz gizakiaren historian izan zuten ondorioekiko. «Zer izan ginen euskaldunok orain bost mende eta zer izaten jarraitzen dugu gaur egun? Historiak, 500 urte geroago, agerian jartzen gaitu eta interpelatu egiten gaitu. Kultura, ekonomia eta gizartea garatzeko aukera bilakatu nahi du urteurren hau fundazioak, eta horrela, etorkizunerako ondarea utzi» azpimarratzen du Fundazioak bere web orrian.

Proiektu batzuk

Fundazioak 2019 eta 2022 artean bultzatuko dituen lankidetzan egindako ekimen zerrenda zabala izango da. Hauen artean ezagutzen diren batzuk honakoak dira; Mundubira kongresu gastronomikoari esker Elkanoren bidaian zehar geldialdi izan ziren herrietako sukaldaritzara hurbiltzeko aukera izango da 2019ko udazkenean. Elkano eta lehen mundubiraren garrantzia aztertzeko ikerketa bultzatuko da, ikerkuntza katedra baten bitartez. Mundubirak ekarri zituen aurrera pauso eta aurkikuntzetan sakonduko da, zirkumnabigazioarekin harremana izan zuten hainbat herrialdetako ikerlariekin elkarlanerako sare egonkorrak sortu nahi dituen kongresuan. Horizonte Elkano estropada, 2019ko uztailean egingo den jaialdi eta estropadak Elkanoren balentria eta lehen mundubiraren historia euskal kostaldera eramango dute, tailer eta jarduera ludikoen bitartez. Aurrerapen bat besterik ez da hau noski, erne egon.