EH Bilduren udal gobernua informazioa ezkutatzen ari dela dio EAJ-ko taldeak

Udalbatzarra. Jeltzaleen udal taldea bozketa batean parte hartzen duten unean. / AMAXKAR
Udalbatzarra. Jeltzaleen udal taldea bozketa batean parte hartzen duten unean. / AMAXKAR

Hainbatetan kexatu da EAJ EH Bilduren presakotasunaz, azken unean ibiltzeaz beti, baina behin eta berriz errepikatzen dela diote jeltzaleak

JUAN MARI ZUBIAURRE GETARIA.

«Getariako EAJ alde batera uzten ari da EH Bildu», hala adierazi du Getariako EAJren udal taldeak. Udalean ezarritako prozedurak eta denborak nahieran saltatu eta beren nahietara egokitu eta informazioa ezkutatzen dabiltzala salatu dute jeltzaleek, «oraintsu arte Getariako Udalean Osoko Bilkura eta batzorde multzo bat egin ohi zen bi-hiru hilabetetik behin. Orain, hilabete bateko epean 3 deitu dituzte eta oso gai mardulekin: bi bilkura eta batzorde bat, non herritarrei zuzenki eragiten dieten eta oso garrantzitsu diren gaiak eraman dituzten: terrazen ordenantza, Sahatsaga Goiko etxebizitzen esleipena eta zergen ordenantza. EH Bilduk bakarrik onartu ditu eta aurrera. Denbora eta proiektuen planifikazio faltatik haratago, EH Bilduk ez digu informazioa pasa azken momentu-arte, lantzeko denborarik utzi gabe, eta aldebakartasunez jardunda, interes konkretu eta bakar batzuei erantzunaz» adierazi dute euren ustez EAJren udal taldea isilarazteko.

Hori gertatu zen urriaren 11n, eta berdina gertatu da baita azken bietan, urriak 22 eta 24an, azpimarratu dutenez. «Bi deialdiak batera egin dituzte, oposizioaren ekarpenak kontuan izateko asmorik azaldu gabe, batean diktaminatu eta 48 ordu baino gutxiagora onartuz. Gainera 22korako informazioa pasa gabe. Nola landu eta bozkatuko dugu ezagutzen ez dugun gai bat? Era errazean esanda: EH Bilduren proposamena soilik aintzakotzat hartuz eta oposizioa guztiz alde batera utzi eta isilaraziz. Herritarroi zuzenki eragiten digun gaia izan da azken bi hauetakoa: zerga eta tasen igoera. EH Bilduk erabaki du igotzea eta ez da eztabaida eta proposamen berriak lantzeko aukerarik utzi. Teknikariek ere ez zuten informaziorik. Igo dituzte eta listo, kasuren batean, %50a gainera».

Errespetu demokratiko falta

Jeltzaleen iritziz honelako jarrerek argi erakusten dute Udal Gobernuaren «errespetu demokratiko falta» beste alderdi politikoekiko, «gainera gehiengo absolutua dute eta nahi bezala egin eta desegiten dute. Horrelako egoera latzean dago Udala EH Bilduren 7 urteko agintaldiaren ondoren. Hainbatetan kexatu gara EH Bilduren presakotasunaz, azken unean ibiltzeaz beti, baina behin eta berriz errepikatzen dela ikusirik, azken batzordean eta bilkuran EAJk ez du parte hartu».

«Aldebakartasunez jarduten dute, ez gobernantza, ez kolaborazioa. Ez dugu inposizioaren jokoan sartu nahi. Gure herrigintzaren eredua gardentasunean, komunikazio aktiboan eta elkarlanean dago oinarritua. Zergatik ez da zuzenki herritarrei eragiten dien gaia udal barruan eztabaidatu? Eta are gehiago, zergatik ez zaie herritarrei egin kontsulta? Zergatik ez da Udala herritarrekin bildu getariarren poltsikoari zuzen-zuzenean eragiten dieten zergei buruz euren iritzia jasotzeko?» galdegin dute.

«Eta zergak eta tasak gorantz doaz Udalaren aurrezkiak geroz eta murritzagoak direnean, Udala dirua xahutzen ari baita... Zertan? Ez enplegua sortzen; ezta gizarte ongizatean aurrerapausoak ematen; herritarren partaidetzan eta gobernantza partekatuan sakontzen ezta ere; ezta herritarrentzako azpiegiturak behar bezala egokitu edo beharrizan berriei erantzungo dietenei erantzuten ere.. Geroz eta gehiago gastatzen du EH Bilduk... baina zertan?» galdetzen jarraitu dute.

«Nahikoa da. Adarra jotzen ari dira. Gobernuari ezarriak dituen prozedurak eta denborak errespeta ditzala eskatzen diogu, beste behin» iradoki dute bukatzeko.

Contenido Patrocinado

Fotos

Vídeos