Bertsolari Txapelketarako sailkapen faseari dagokion bertso saioa, bihar Orion

El Diario Vasco
EL DIARIO VASCO ORIO.

Gipuzkoa Bertsotan izenpean jokatuko da aurten, 2019an, Gipuzkoako Bertsolari Txapelketarako sailkapen-fasea. Sailkapen fase hau gaur hasiko da, maiatzaren 4arekin larunbatean, Asteasun eta Idiazabalen, eta 25ean bukatuko da, Donostian. Guztira, 14 saio jokatuko dira beste horrenbeste herritan. Egun bakoitzean, ordu berean, bi saio izango dira.

Guztira, 84 parte-hartzaile izango dira sailkapen-fase desberdinetan eta, horiei laguntzen, 15 gai-jartzaile, 18 epaile, 3 idazkari eta beste hainbat lagun izango dira antolakuntza lanetan lehiaketa honetan.

Sailkapen-faseko saioetako bat Orioko Kultur Etxean izango da igande honetakoa hain zuzen ere, maiatzak 5, bihar, arratsaldeko 17:00etan hasita. Bertan parte hartuko dutenak ondorengoak izango dira: Asier Azpiroz Iztueta, Oier Aizpurua Olaizola, Urko Egaña Calderon, Andoni Otamendi, Joseba Andoni Agirre Orbegozo eta Jokin Irastorza Zabalegi.

Igandeko beste saioa Anoetako Mikelasagasti Auditorioan gauzatuko da. Bertan izango direnak: German Urteaga, Antton Fernandez Lasa, Odei Lopez Larrauri, Beñat Jauregi , Markel Eizagirre eta Eder Iturralde.

Sarrerak

Bertso saioak ikusteko sarrerak salgai izango dira saioa ospatzen den gunean eta egun horretan bakarrik. Ondorioz, Orioko lehiatila (Kultur Etxean) arratsaldeko lauretan irekiko dute. Sarrera bakoitzak zazpi euro balioko du. Bazkideek eta gazteek bost euro ordaindu beharko dituzte (6 eta 16 urte bitartekoak).