Basurdeek hainbat kalte eragin dituzte herri inguruko baratzeetan

Kalteak eragin dituzte basurdeek hainbat baratzetan. / A.MARTIN
Kalteak eragin dituzte basurdeek hainbat baratzetan. / A.MARTIN

Ehiztarien grebaren ondorioz, espeziearen populazioa handitu egin da azken hilabeteetan

AINARA MARTÍNZESTOA.

Gipuzkoako ehiztariek sei hilabeteko greba amaitutzat jo duten une honetan, basurdeek Zestoa inguruko lursailetan egin dituzten kalteak agerikoak dira. Ehiztariak martxotik zeuden greban eta ehizako aktibitatearen geldialdi honek zenbait espeziearen populazioa handitzea eragin du, batez ere basurdeena eta orkatzena.

Herri inguruan, kasik kalean, basurde andanak (kume eta guzti) begiztatu izan dira azken hilabeteetan. Animaliok egunak joan egunak etorri agertzen dira eta pertsonekiko beldurra erabat galduta, baratze zein lursailak suntsitu dizkiete zenbait baserritarrei hilabeteetako lana eta esfortzua bertan behera utziz.