Bainuetxeko langileek lan baldintzak salatu eta egutegia izateko eskubidea aldarrikatu dute

Bainuetxeko langileen kontzentrazioa. / MARTIN
Bainuetxeko langileen kontzentrazioa. / MARTIN

AINARA MARTINZESTOA.

Pasa den asteartean, hilaren 20an, Zestoako Bainuetxeko langileek elkarteratzea egin zuten Bainuetxeko sarrera nagusiaren aurrean. 2016. urtetik dabiltza lan egutegiak Gipuzkoako lan ikuskaritzan salatzen eta adierazi dutenaren arabera «urtero salatu behar izaten dugu enpresak langileoi ez dizkigula lan egutegiak ematen, hitzarmenean jasota daukagun gai bat denean eta ikuskaritzak, halaber, arrazoia eman digunean behin eta berriz». Salaketa hauen aurrean ikuskaritzak enpresari isunak jartzen dizkio baina dirudienez ez da nahikoa, izan ere, «hurrengo urtean, berdinetan dago eta argi dago isunak ordaintzea ez zaiola axola». Langileek aldarrikatzen dute beraientzat ezinbestekoa dela egutegiak izatea lana eta bizita pertsonala kontziliatu ahal izateko eta enpresaren «esklabu» ez bilakatzeko.

Egutegia izatearen eskubideez gain, langileek dituzten baldintzak salatu nahi dituzte. «Bainuetxe honetan lasaitasuna eta gorputzarentzat tratamenduak eskaintzen ditugu, bai, baina langileon egunerokoa guztiz aurkakoa da». Lan karga handiak izateaz gain, lan berbera egiteko geroz eta langile gutxiago daudela adierazi dute, bajak eta ordezkapenak ez direla kubritzen. Ildo honetatik, ondorio bezala azpimarratu dute «gero eta langile gehiagok hartzen dutela baja lan kargen eta lesioen ondorioz. Honek guztiak ezinbestean gure lanaren kalitatean eragin zuzena dauka eta bezeroak ere nabaritzen dute».

Langileek gogora ekarri dute «zuzendaritzak, 2013. urtean Mariano Rajoyren lan erreformaz baliatuz, enpresa hitzarmena sinatzera behartu eta langileon soldatak %15era jaitsi zituela hotelaren itxierarekin mehatxatuz». Era berean, aditzera eman nahi dute «enpresa honek gogor kolpatu gaituela urtetan zehar».Arrazoi hauek guztiak medio, abuztuaren 27n beste kontzentrazio bat egingo dute Bainuetxeko atarian 15:30ean. Azpimarratu dute borrokan jarraituko dutela beraien lan baldintzak egonkortu eta beraien eskubideak behingoz eta betiko bermatu arte.

Ekain sagardo ekologikoa

Igande honetan, abuztuaren 25ean, Irure Txiki baserrira bisita egingo da Biolour Gipuzkoako Nekazaritza Ekologikoaren aldeko elkartearen eskutik. Irteera hau Urola Kostako jardunaldi ekologikoen barnean antolatu dute eta bertan Ekain sagardo ekologikoa dastatzeko aukera egongo da 10:00etatik 13:00etara. Datorren igandean egingo den saio hau doakoa da, baina parte hartu nahi duten horiek izena ematea beharrezkoa da. Interesa dutenek dei dezatela 943 76 14 47 telefonora.