Zezenaren inguruko festa Azpeitian

Kioskotik. Zezenari errepestua, batetik, eta euria, bestetik, kioskotik ikusteko aitzakia paregabea! / ELI AIZPURU
Kioskotik. Zezenari errepestua, batetik, eta euria, bestetik, kioskotik ikusteko aitzakia paregabea! / ELI AIZPURU

Zezen Beltz asteburua ospatu dute Urolako herrian eta ekitaldi ugari izan dira | Hamargarren urteurrena bete du zezenzale elkarteak eta jolasekin batera, jatekoa ere nahikoa izan da

ELI AIZPURU AZPEITIA.

Zezen beltz elkarteak hamar urte bete ditu. Hori dela eta, berezia izan da aurtengo izen bereko asteburua. Ostiral iluntzean hasi zen, urteurrena ospatzeko ekitaldiarekin. Jende andana bildu zen orduan Sanagustin kulturgunean eta data bereziarekin osatu duten bideoa ikusteko parada izan zuten gerturatakoek. Ondoren, mokadua egin zuten.

Hurrengo egunean, zezen txikiek eta haurrek izan zuten protagonismoa. Entzierroa egin zuten estreinako Erdikaletik plazara eta zezentxoekin jolasteko aukera izan zuten gero. Arratsaldean, helduek nahiz haurrek gozamenerako tartea izan zuten zezen plazan. Bertan jokatu zen Grand Prix saioa. Zezenarekin batzuk eta gabe beste ba-tzuk, proba ugari jokatu zituzten lehiatu ziren lau taldeek: Zezen Beltz elkarteko kideak, neska koadrilla bat, ondarrutarrak eta azkoitiarrak. Azken hauentzat izan zen garaipena.

Azken eguna izan zen atzokoa. Eguraldiak zapuztu zuen ekimena baina hala ere, zezenarekiko afizio ikaragarria dutela Azpeitian nabarmendu zuten txikitxoek, euripean ibili baitziren jolasean. Aldiz, busti gabe baina ekitaldiekin gozatzeko tartea hartu zuten helduek. Izan ere, Sanagustinpean sahieskia eta oilasko errea banatu zituzten eta jende ugari gerturatu zen, euriak euri,dastaketara. Amaitzeko, helduen entzierroa ere egin zen.

Contenido Patrocinado

Fotos

Vídeos