'Umorea oso kontu serioa da' jardunaldiak daude Sanagustinen bihartik asteazkenera

Umoreaz hausnartzeko tartea izango da hiru egunetan zehar, 19:00etatik aurrera eta herriko irudigileekin erakusketa ere osatu da

ELI AIZPURU AZPEITIA.

Mundua txistea bada, egin dezagun barre gutxienez. Horrelako zerbait pentsatu dute Azpeitiko Kultur Mahaiko, Kulturaz kooperatibako eta Udaleko antolatzaileek. Izan ere, bihartik, astelehenetik, asteazkenera bitartean umorearen inguruko hausnarketa ipiniko dute abian 'Umorea oso kontu serioa da' lelopean. Sanagustin kulturgunean izango da, 19:00etatik aurrera.

Antton Olariagaren eta Kike Amonarrizen hitzaldiarekin hasiko dira hiru egun iraungo duten jardunaldiak. Olariaga komikigilea da. Zakilixut pertsonaiarekin 40 urtetik gora daramatza. Zazpiak Batman kolektiboko kidea Kike eta Asiskorekin batera. Amonarriz euskal filologian lizentziatutako soziolinguista, umorista eta telebista-aurkezlea da. Euskal Telebistan Hitz eta Pitz, Funtzioa, Hau da A.U., Benita Marini, Balinda, Bai zera, Txiskola Sikofonia, Tribuaren Berbak, Mihiluze eta Burubero saioen aurkezlea izan da.

Hilaren 25ean 'Esklabo alaiak' nobela grafiko politikoa aurkeztuko du Asisko Urmenetak. Komikigilea, ilustratzailea eta marrazkilaria da Urmeneta.Korrok eta Napartheid fanzineen sortzailea, Argia, Xabiroi eta H28 aldizkariko kolaboratzaile eta Zazpiak Batman kolektiboko kidea. 2011n Gartxot, konkista aitzineko konkista filma zuzendu zuen. Iaz argitaratu zuen Eusklabo Alaiak eleberri grafikoa.

Azkenik, asteazkenean, hilaren 26an, Idoia Torregarai umorezale eta umoregileak umoreaz eginiko hausnarketei buruzko bakarrizketa saioa eskainiko du. Formazioz kazetaria eta gidoilaria da Torregarai, egun komunikazio arduraduna da eta 2012an Barretartia umore bloga ireki zuen.

Jardunaldiez gain, gaiarekin lotutako erakusketa jarriko da, asteartetik urriaren 9ra bitartean. Bertan Andoni Salegi 'Otsobeltz', Enok Sudupe eta Jon Berdejoren lanak ikusi ahal izango dira.

 

Fotos

Vídeos