San Tomas egun jendetsua

Txerritxoek, txikienen artean batik bat, arrakasta izan zuten./E.A.
Txerritxoek, txikienen artean batik bat, arrakasta izan zuten. / E.A.

Nahikoa txistorra, talo eta sagardo dastatzeko aukera izan zuten gerturatutakoek eta bertako produktuekin osatutako azoka ere ikusgarria zegoen Neguari hasiera giro ederrean eman zitzaion atzo

ELI AIZPURUAZPEITIA.

«Bai ederra dagoela», hala zioten atzo goizean eta eguerdian Azoka Plazatik igarotzen zirenek. Guztiak ados jarri zirela zirudien. Izan ere, estreinekoz Azoka Plaza eraberrituan egin zen santomasetako feria eta aurrekoarekin alderatuz, bazirudien baserritarrek bertara eraman zituzten produktuek gehiago luzitzen zutela. Barazkiak, frutak, ogia, eztia edo artisauen lanak, denetik zegoen erakusgai eta erosgai. Tartean, aspaldian ez bezala, txerritxoak ere ikus zitezkeen, gehienbat haurren gozamenerako. Baserritarrek zein baino zein postu dotoreagoak ipini zituzten.

Santo Tomas Eguna txistorra eta taloa jateko eguna da, usadio zaharrarri jarraituz. Atzokoan ere, herriko hainbat ikastetxe eta elkarte gogoz saiatu ziren plazan ipinitako postuetan bertara hurbildu zen jendetzari arreta ezin hobea eskain-tzen. Goiza aurrera joan ahala, gero eta gehiago izan ziren plazara hurbildu zirenak. Jan eta edan ondo egiteaz aparte, baserritarren egun honetan ez dira herri kirolak falta ohi. Aimar Irigoien, Jon Unanue Goenatxo III.a eta Karmele Gisasola aritu ziren harriarekin. Aizkoran herritar Mikel Larrañaga izan zen eta arerio izan zuen Eneko Otaño beizamarra (aurrez Iker Vicente hitz emanda bazegoen ere). Herri kirol zaleek ikuskizun polita ikusteko parada izan zuten. Eguna alaitzeko, tuntturroak, erraldoi eta buruhandiak, musika eskolako soinujoleak eta beste hainbat izan ziren.

Herritar ugarik egin zuen bat Azoka Plazaren edertasuna goraipatzerakoan

XXXV. Antzerki Topaketetako sari banaketa ere egin zen, udaletxean. Zestoako Eromen Produkzioak taldearen 'Hysteria' antzezlanak jaso du aurten ikusleen saria. Beraientzat izan dira topaketetan ikusleeen boto gehienak eta 600 euroko diru saria jaso zuten.

 

Fotos

Vídeos