Soreasuko Sormen Gunea ezagutzeko aukera izan dute herritarrek

Herritarrak, kultur mahaiko kideen eta udal arduradunen argibideak entzuten. /  UDALA
Herritarrak, kultur mahaiko kideen eta udal arduradunen argibideak entzuten. / UDALA

Ekainean irekiko da Dinamoa; hitzaren, gorputzaren eta irudiaren eremuak egokitu dira eta aurki soinuarenari ekingo zaio

ELI AIZPURU AZPEITIA.

Pasa den zapatuan, Kultur Mahaiak batzarra aurreikusita zuela aprobetxatuz, Sormen Gunea ezagutzeko aukera izan zuten hainbat herritarrek. Bisita gidatuak egin zituzten Soreasuko gune berritua ikusteko. Dozenaka herritar bertaratu zen eta Sormen Guneko Irudiaren, Hitzaren nahiz Gorputzaren Eremuak ikusi eta horietan garatuko diren proiektuen berri jakiteko aukera izan zuten. Soinuaren Eremuko obrak bigarren fase batean garatuko dira.

Kultur Mahaiko kideez gain, bertan izan ziren Udaleko ordezkariak ere. Bisitaren hasieran, azpiegitura egokitzeko lanean aritu diren langileak eskertu zituzten Eneko Etxeberria alkateak eta Xabier Gantzarain Kultur Mahaiko kideak.

«Ia 15.000 biztanleko herria gara. Aurrera egiteko inbertitu egin behar dugu, baita kulturan ere. Azpeitiko Udalak azpiegitura hau bukatzeko milioi bateko inbertsioa egin du; hau da, azpeitiarrok milioi bat inbertitu dugu kulturan. Baina Azpeitiak eta kultur mugimenduak behar ditu horrelako inbertsioak, eta etorkizunean herriari bueltan itzuliko zaio», adierazi zuen Eneko Etxeberria alkateak.

Josu Labaka Kultura Batzordeburuak sormen gunea «emaitza baino abiapuntua» dela esan zuen. «Aberastasuna sortzeko gunea izango da ekainetik aurrera. Kulturak erronka handiak ditu aurrera begira: sormena, belaunaldien arteko transmisioa... horiei heltzeko gunea izango da honakoa».

Sormen Gunea kultur eragileekin batera diseinatzeko prozesua landu dute Udalak eta Kultur Mahaiak elkarlanean. Ekainetik aurrera proiektu hori ahalbideratuko duen azpiegitura da Sormen Gunea. Hitzaren, gorputzaren, hitzaren eta irudiaren eremuak egokitu dira. Ia milio bateko aurrekontua (994.348,94 €takoa) izan du obrak. Epe motzean soinuaren eremua egokitzeko konpromisoari ekingo zaio.