Santo Tomas egun jendetsua eta epela

Azoka plazan ipinitako txerritxoek ikusmina sortu zuten, batik bat txikitxoen artean / ARGAZKIAK ELI AIZPURU
Azoka plazan ipinitako txerritxoek ikusmina sortu zuten, batik bat txikitxoen artean / ARGAZKIAK ELI AIZPURU

Abendua izateko egindako eguraldi ezin hobeak herritar ugari bildu zuen plazan | Nahikoa barazki, artisautza, gazta edo ogi postuak zeuden azoka plazan eta, ohi bezala, protagonistak txistorra eta taloa izan ziren

ELI AIZPURU AZPEITIA.

Santo Tomas Eguna gorrian dute egutegian azpeitiarrek eta atzokoan, gainera, neguari sarrera eman baino, saninazio jaiak ziruditen baserritar jantziengatik ez balitz izan behintzat. Izan ere, eguraldi epelak, eguerdian plazan jotzen zuen eguzki goxoak, kalera ateratzeko pereza erabat kentzen zuen eta jende ugari gerturatu zen festara.

Goizean goizetik ikastetxeek eta herriko beste hainbat eragilek ipinitako postuek hartu zuten protagonismoa. Postuek baino, bertan eskintzen zenak. Izan ere, txistorra kiloak eta kiloak banatu ziren. Ba- tzuk elkarterako eta beste batzuk ikasbidaia egiteko, nahikoa lan izan zuten egun osoan zehar. Taloa, txorizoa edo sagardoaz gainera, herri kirolek ere hartu zuten protagonismoa. Zaletu ugari bildu zen 12etarako plazan eskaini zuten ikuskizunaz gozatzera. Mikel Larrañaga eta Iker Vicente aizkolariek erakustaldi bikaina eskaini zuten; eta harriarekin Udane Ostolaza, Xabier Aranburu 'Guzta' eta Joseba Ostolaza aritu ziren. Aimar Irigoien errezildarrak ez du hutsik egin ohi egun honetan, baina aurtengoan lesio bat medio, ezin izan du Azpeitian aritu Errezilgo txapeldunak.

Herri kirolak plazan ikusgai ziren une berean, Izarraitz frontoian Patxi Azkargortaren omenezko pilota finalak jokatu ziren. Musikak ere ohiko tartea izan zuten festa handi honetan, Musika Eskolako trikitilariak, Itsasiko tunturruak, erraldoiak eta buruhandiak ere kalejira egin zuten Eltziegoko dultzaineroek lagunduta.

Antzerki saria

Urtero bezala, Antzerki Topaketetako Ikusleen Saria ere banatu zuten udaletxeko aretoan. Xake Produkzioaren 'Lur' antzezlanarentzat izan zen saria; Josu Labaka Kultura batzordeburuak eman zien saria taldekideei, tartean Erika Olaizola aktore azpeitiarrari esanez: «Kalitate handiko lanak izan ditugu aurtengoan, zuena tarteko, eta ohore bat da zuei sari hau ematea. Zorionak!», esan zuen.

Gazteen XVIII. Dantza Sueltoko Azpeitiko Txapelketa ere jokatu zen arratsaldean, eta 16bikotek hartu zuten parte (honen berri datozen egunetan emango da).