«Osatu dugun taldea berme bat da Azpeitia hobetzeko bidean jauzi bat emateko»

EH Bilduko hautagaiak, atzean Enparan dorretxea dutela. /  EH BILDU
EH Bilduko hautagaiak, atzean Enparan dorretxea dutela. / EH BILDU

Nagore Alkorta, EH Bilduko alkategaiaren hitzak dira, taldeak egindako batzarraren ostean. Bertan, udal hauteskundeetarako zerrenda onartu zen

ELI AIZPURU AZPEITIA.

EH Bilduk datozen maiatzeko udal hauteskundeetako 20 laguneko zerrenda onartu zuen ostegun iluntzean egindako herri batzarrean. Oinarriek botoen %100eko babesarekin onartu zuten proposamena eta horrek «indar handia» ematen diela lanean jarraitzeko adierazi zuten. Nagore Alkorta alkategaiaren arabera, «ilusioa eta esperientzia» dira taldearen ezaugarri nagusiak, eta «lanerako zein harremanetarako talde ezinhobea» da.

«Azpeitia oso ondo ezagutzen duten pertsonak ditugu taldean, esparru, adin eta sentsibilitate desberdinetakoak. Modu batera edo bestera, herrigintzan aritu diren bizilagunak bildu ditugu, eta horrek gure herriaren ikuspegi zabala ematen digu. Gainera, gutako askok barrutik ezagutzen ditugu erakundeak. Osatu dugun taldea berme bat da: Azpeitia aldatzen jarraitzeko bermea, eta herria hobetzeko bidean jauzi bat emateko bermea», azaldu zuen.

Alkortaren esanetan, zerrendan udalean «lan asko» egin duen eta kudeaketan «pisua»izan duen jendea dago, batetik, eta «aire berria» ekarriko duten «gaitasun handiko» pertsonak daude, bestetik.

Honakoa da maiatzaren 26ko hauteskundeetarako EH Bilduk osatu duen zerrenda: Nagore Alkorta Elorza, Josu Labaka Zuriarrain, Eneritz Albizu Lizaso, Aitor Bereziartua Etxeberria, Leire Goenaga Uzkudun, Agustin Lizarralde Odriozola, Ainara Larrañaga Irulegi, Mikel Odriozola Arakistain, Idoia Arrizabalaga Aldalur, Egoitz Arruti Uria, Nerea Illarramendi Zubimendi, Ismael Ruiz de Argandoña Arzallus, Arantxa Oñederra Vergara, Aitor Letamendia Portalo, Lorea Aizpuru Arozena, Joxe Mari Iturria Egaña, Olatz Izagirre Sarasti, Haritz Arakistain Valverde, Aiora Etxeberria Iturralde eta Ander Larrañaga Zinkunegi.