Korputz jaiak ospatuko dituzte Enparan kalean bihar

Ohitura den bezala, hainbat kaletarrek omenaldia jasoko dute eta aurtengoan hiru izango dira omenduak

AZPEITIA.

Enparan kalean Korputz jaiak ospatuko dituzte bihar, igandean. Hori dela eta, egun osoko egitaraua prestatu dute bertan. Ohiko moduan, suziria botata hasiko dituzte jaiak 11:30ean, eta gero, txistularien kalejira izango da. 12:00etan, berriz, meza izango da Frantziskanetako elizan, eta segidan, 13:00etan, luntxa egingo dute.

Ohitura den bezala, Baigera jatetxean elkartuko dira ondoren, urteroko bazkari legea egitera. Bazkalostean egin ohi duten bezala, omenaldiak izango dira. Aurtengoan hiru kaletar omenduko dituzte, Ana Mari Egurza, Tomas Gereta eta Jose Antonio Azpiazu, hain zuzen ere.

Hiru omenduei aurreskua dantzatuko diete goizeko mezaren ostean eta bazkarian etxekoez eta lagunez inguratuta izago dira. Nola ez, bertsolariek eta trikitilariek alaituko dute Baigerako zita eta behin omenaldiak amaituta, Baigerara gerturatzen direnek dantzaldiaz gozatzeko aukera izango dute jai egunari amaiera emateko.