«Inoiz baino jende gehiago izan da Euskal Antzerki Topaketetan»

Martin Zalakain lanak eman zien amaiera Topaketei. /  UDALA.
Martin Zalakain lanak eman zien amaiera Topaketei. / UDALA.

Kultura batzordeburu Josu Labakak aurtengo edizioaren «oso balorazio positiboa» egin du

ELI AIZPURU AZPEITIA.

Duela aste pare bat eman ziren amaitutzat euskara hutsean Azpeitian ospatu ohi diren Euskal Antzerki Topaketaki eta datuak eskuetan, balorazioa egin du kultura batzordeburu Josu Labakak.

Aurtengo edizioan, «gorako pauso garrantzitsua» eman dutela Euskal Antzerki Topaketek adierazi du zinegotziak. «Azken urteotako topaketa luzeenak eta emankorrenak izan dira eta azken hiru urteetako emanaldietako ikuslego kopuru handiena izan da, gainera», azaldu du.

Urriaren 27an hasi ziren topaketak Matxinadaren herri antzerkiarekin, eta azaroaren 26an bukatu zen 'Martin Zalakain' ikuskizunarekin. Tartean hamaika ikuskizun izan dira adin tarte eta gustu desberdinetako herritarrentzat. «Ikusleek ez dute hutsik egin. Kopurua goraka joan da eta hori seinale oso ona da guretzat», azaldu du Labakak.

Bataz beste 300 eta 350 pertsona inguru izan dira saioko, guztira 4.200 bat lagun. «Datu oso baikorrak dira. Antzerki zaletasuna gure herrian bizirik dagoela nabari daiteke, eta antzerkigintzak gure herrian etorkizuna baduela erakutsi da beste behin, Matxinada ikuskizunarekin zein datu horiekin, gaineratu du udal arduradunak.

Topaketen 'harribitxia'

Haur zein helduei zuzendutako eskaintza zabala izan da topaketetako asteburuetan zehar eta horien artean Eskola Antzerkia nabarmendu du Labakak. Eskola Antzerkia da topaketen harrobiaren «harribitxia» dio. Aurten, Euskal Herriko zazpi ikastetxetako antzezlanak izan dira ikusgai. Horretaz gain, Corrado Masacciren '40. urteurrena. Txotxongilo bilduma' emanaldia eta ikustaldi gidatuak antolatu eta eskaini zaizkie ikastxeetako haurrei, eta ekintzaren oso balorazio positiboa egin dute. Txotxongilo tailerrak eta ikustaldietan adin desberdinetako 2.945 ikaslek hartu dute parte.

Bukatzeko, eskerrak eman dizkie «antzerki obrak ikustera joan diren guztiei, horiek ematen baitiote zentzua topaketei». Bestalde, «antzezle, zuzendari eta bestelakoei» Azpeitira etortzeko izaten duten «prestutasuna» ere eskertu nahi izan du. Topaketa hauek aurrera ateratzeko aurretik zein hilabetean lanean ari-tzen diren «teknikariak» gogoratu ditu, hauei ere eskerrik beroenak luzatuz.

 

Fotos

Vídeos