«Hogei eguneko grabazioak egin ditugu eta martxoan amaitzea espero dugu»

Herriko hainbat lagun izango dira aktore lanetan, lantaldekoez aparte. /  BALEUKO
Herriko hainbat lagun izango dira aktore lanetan, lantaldekoez aparte. / BALEUKO

Asier Sustaeta azpeitiarrak zuzendutako 'Korosagasti' fima aurrera doa, eta Loiolan ari dira grabaketetan

ELI AIZPURU AZPEITIA.

Azpetia eta inguruetan oihartzun handia izan zuen krimen bat ekarriko du gogora Erabaki Produkzioaken azken lanak, Asier Sustaeta azpeitiarraren gidaritzapean. 1926an, Beizaman, ama-alaba batzuk agertu ziren hilik, Korosagasti baserrian. Tolosara lanera joanda zegoen beste ahizpa batek aurkitu zituen gorpuak. 'Mutismo' handia egon izan da urteak pasa ahala gertaera haien inguruan. Sustaetak, erakarrita, pantaila handira ekarri nahi izan ditu gertaera haiek. «Istorioa aspalditik ezagutzen genuen. Duela 5 urte, Pedro Otaegi aktorearekin, inguruko istorio edo kronika beltzen inguruan hizketan, Korosagasti aipatu zigun. Orduan, beste proiektu batzutan murgildurik genbiltzan eta alde batera utzi nuen», dio Asier Sustaetak. Duela pare bat urte ordea «100 urteko egunkari bat topatu» zuen «sarean saltseatzen» zebilela. «Estos son los asesinos del crimen de Korosagasti, zioen ida-tziak», azaldu du Sustaetak. Eta «fletxazo» bat izan zen. Ordutik, «buruan bueltaka» izan zuen.

Orain arte, laburmetraietan eta antzerako proiektuetan hartu izan du parte Sustaetak eta orain hartutako lanak «salto» handia suposatzen duela dio. Horretarako sorkuntza beka eskatu zuten, Azpeitiko Udalak eta Kultur Mahaiak sormena eta herritarren proiektuak laguntzeko eman ohi duen diru-laguntza, alegia.

Ikus-entzunezkoa ekoizteko hainbat arte disziplinetan lanean aritzen diren herritarren laguntzaz baliatu dira Erabaki Produkzioakekoak.

Dokumentazio lan sakon bat egin ondoren, Miren Gorrotxategiri eta Alaitz Olaizolari eman zieten filmaren gidoia sortzeko aukera, eta herriko bi idazleek 2017ko negurako idatzi zuten istorioa, Sorkuntza Beka baliatu zuten Korosagasti filmaren gidoia osatzeko eta ekoizpenaren lehen faseko lanetarako. Bigarrenez jaso dute diru-laguntza, eta «lokalizazio eta grabaketa lanetarako» erabiliko dute baita ere.

58 aktore

Sustaeta bera da zuzendaria baina 30 bat lagun inguruko lantaldea bildu du. Honela, Itziar Elias arduratuko da arte zuzendaritzaz. Aktore zuzendariak, berriz, Idoia Uranga eta Amancay Gaztañaga dira, eta jantzien ardura Xanti Alkortarena da. Irudi zuzendaritzan ari da Oihan Amezua eta honek ere lantalde polita osatu du inguruan. Horrez gainera, 58 aktorek hartuko dute parte filmean, eta horietako asko azpeitiarrak eta bailarakoak dira. Gero, beste figurante ugari behar dituzte. Parte hartu nahi duen edonork korosagasti@gmail.com helbidera idatzi dezake, izen-abizenak eta adina zehaztuta.

Egunotan «buru-belarri» dabiltza grabazio lanetan. Zabalaga baserrian aritu dira, Beizaman ere bai eta Loiolan izango dira asteburuan. «Basilikako atzealdean kartzelako atariko irudiak kokatu ditugu», azaldu du zuzendariak. «Eguraldiak laguntzen badigu behintzat», nahikoa lan izango dugu. «Afizioz» egindako lana da eta askotan «oso zaila egiten da familia, lana eta afizioa uztartzea. Horregatik «etxekoei batik bat» izandako ulermena eskertzen die Sustaetak.

Dena ondo badoa, «martxoan» amaituko dituzte grabaketak eta muntaia lan guztiak eginda, filma ikusteko moduan izango da urte amaierarako. Errelidade bihurtuko dute beraz, askotan herrian entzun ohi zena, gertaera haiek filma batera eramateko modukoak zirela, alegia.