Gaurtik asteazkenera bitartean, sanisidro jaiak Aratzerreka auzoan

Atxur festie egin zenekoa. /  E.A.
Atxur festie egin zenekoa. / E.A.

Txupinazoaren ostean, bihar Atxur festie izango da bertan. Gero, zaindariaren egunean jarraituko dute ospakizunekin |

ELI AIZPURU AZPEITIA.

San Isidro Eguna gerturatzen ari da eta horren bueltan auzoko jaiak ospatuko dituzte Aratzerreka auzoan. Gaur, hasiko dira ospakizunekin; bihar jarraituko du festak eta azken jai eguna, asteazkenean, zaindariaren egunean, maiatzaren 15ean izango dute.

Ohi bezala, aitzurraren igoerarekin hasiko dira festak Aratz errekan. 19:30ean izango da, txupinazoarekin. Ondoren,19:45ean, pintxo-potea egingo dute eta 20:30ean afaria dute aurreikusita. Hitzeder eta Haritz Garmendia trikitilariek girotuko dute gaua.

Bihar, zapatua, berriz, Atxur Festie ospatuko dute auzoan. Goizean, 10:30erako itxaferoekin esnaraziko dituzte auzotarrak, gaueko ajeak alde batera laga eta festari ekiteko. Arratsaldean egunari izena ematen dien festa egingo dute; hala, 16:30etik aurrera, haurrek aitzurrarekin altxorraren bila, zimaur zabaltzen, sokatiran, artaburuak zuritzen nahiz lokotxak biltzen aritu beharko dira.

Ondoren, 18:00etan hasita, herri kirol erakustaldia izango da, Mikel Larrañaga eta Eneko Otaño aizkolaria eta Jon Unanue Goenatxo III.a. izango dira bertan. Afaria egingo dute gero, 21:00etan, eta afalostea girotzeaz berriz, Eneko Arbeo, Garixe eta Montte trikitilariak arduratuko dira.

Ohitura bihurtu den bezala, gauerdia pasatzean, ordubatak inguruan, lehiaketa xelebrea egingo dute: nork hiru arrautza egosi lehenago jan. Irabazleak 30 euro eta dozena arraultza eskuratuko ditu.Baratzuri-zopa dastatzeko aukera ere izango du 03:30ak inguruan.

San Isidro eguna

Asteazkenean, maiatzaren 15ean, izango da San Isidro eguna. Ekitaldi ugari antolatu dituzte Aratzerrekan zaindaren egunerako ere. Meza ospatuko dute estreinako, 12:00etan. Ondoren, 13:30ean, bazkaria izango dute gerturatzen direnek. Nola ez, trikitilarien emanaldia izango da, Eneko Arbeo eta Txibilter izango dira bertan.

Arratsaldean pilota partidak izango dira Elkartasuna frontoian. Santio jaietako txapelketako partidak jokatuko dituzte benjaminek eta ondoren Kimuen partidak ikusteko aukera izango da Ugaitz Aranguren eta Peio Ziarsolok Eritz Etxeberria eta Manex Azpiazuren aurka jokatuko dute. Egunari eta jaiei bukaera emateko, aitzurraren jaitsieta eta afaria egingo dituzte, 20:30ean, datorren urtera arte sanisidroak agurtzeko.