Emaitza onak lortu dituzte Iokin Agirrek eta Arantzazu Aranetak Fiteroko rallyan

Argazkian, eskuinetik hasita, Agirre eta Araneta./ARANTZAZU ARANETA
Argazkian, eskuinetik hasita, Agirre eta Araneta. / ARANTZAZU ARANETA

MIREIA GALARZAAZPEITIA.

Joan den zapatuan izan zen Fiteroko X. Rallya, eta bertan izan ziren, besteak beste, Iokin Agirre eta Arantzazu Araneta azpeitiarrak. Eta ez zituzten edonolako emaitzak lortu; izan ere, sailkapen orokorrean bosgarren postua eskuratu zuten. Hori gutxi ez eta, gainera, Euskal Herriko rallyen txapelketarako puntuagarria zen Fiteroko proban hirugarren denborarik onena lortu zuten azpeitiarrek. Beraz, emaitza horiek lortuta, ehun euroko diru saria eskuratu zuten Agirrek eta Aranetak. Proba «uste baino gogorragoa» egin zitzaiela gaineratu du bikoteak, batez ere, 3 zati gauez egin behar izan zituztelako eta bero handia egiten zuelako.

Fiterokoa ez da azpeitiarrek podiumera iristea lortu duten lehen aldia izan. Izan ere, ekain amaierako Goilurrak Basque Higlands rallyaren lehen edizioan hirugarren egin zuten azpeitiarrek; 58 minutu eta 29 segundo behar izan zituzten zortzi zatitan banatutako ibilbidea amaitzeko.

Aurretik auto mundua atsegin arren, 2013an hasi zen bikotea rally munduan murgiltzen. «Iokinen lagun batek rallyan ateratzeko autoa utziko zigula esan zigun, baina baldintza ni Iokinekin ateratzea zen», dio Aranetak. Harrezkeroztik, ia 30 rallytan atera da bikotea, eta «afizio garestia» dela aitortu arren, ez dute momentuz gelditzeko asmorik. «Gurean, Iokinek egiten du eskulan guztia, eta horrek asko txikitzen ditu gastuak. Hala ere, babesleak eduki ezean, garestia izaten jarraitzen du». Denboraldia amaitu arte beste hainbat probatan aterako direla ere aipatu dute azpeitiarrek.