Azpeitia

Ehun lagun baino gehiago elkartu dira Goenan Zuhaitz Egunean

Zuhaitz Eguna antolatu zuten igandean Ekoetxeak eta Azpeitiko Udalak Urola Bizirik talde ekologistarekin elkarlanean. Eguraldi ezin hobearekin Goenan elkartu ziren ehun lagundik gora eta 240 zuhaitz inguru landatu zituzten denen artean, hainbat espezietakoak. Aparkalekutik begiratuta ezkerraldera, haritzak, elorri zuria, gaztainondoak, sagarrondoak, zumarrak, lizarrak, artea eta abar sartu zituzten; eskuineko aldean, berriz, zuhaixkak: hurritzak, gurbitzak, intsusak... Zelaiaren bazterreko aldeetan egin dituzte landaketak, erdiko eremua zelai utziz.

Zuhaitzak landatzeaz gain, babesgarriak ere jarri zizkieten enborren beheko aldean. Landatutako zuhaitz ia guztiak Urola Bizirikek Madalenan duen hazitegian sortutakoak dira. Hamaiketako batekin borobildu zuten goiza.