Basazabal jauregia eta Igarako errota bisitatzeko aukera izango da Aste Santuan

Astelehenera bitartean bi guneak zabalik izango dira bai bisitarientzat edo bertaratu nahi duten herritarrentzat

E. A. AZPEITIA.

Astelehenera bitartean, hau da, Aste Santuak irauten duen bitartean, Azpeitira etortzen diren bisitariek nahiz bertan gelditzen direnek herriko hainbat txoko bisitatzeko aukera izango dute. Honela, Basazabal jauregiak ordutegi berezia izango du jaiegunetan; egunero irekita egongo da: igandera arte, goizez eta arratsaldez izango da zabalik, 11:00etatik 14:00etara eta 16:00etatik 19:00etara, eta astelehenean, berriz, 11:00etatik 14:00etara.

Igarako errota ere zabalduko dute egunotan. XVIII. mendekoa da gunea, eta garai hartako errotek nola funtzionatzen zuten jakiteko aukera eskaintzen du. Honela, astelehenera arte, egunero, 12:00etan irekiko dute errota, eta bisita gidatua egingo dute Ekoetxeako hezitzaileek gidatuta. Bisitak doakoak izango dira, eta errota ezagutu nahi duenak ordurako bertara azaltzea nahikoa izango du.