Ardoaren eta Arrainaren ibilbideko zazpigarren etapa egingo da zapatuan

Aurreko etapetako bat.
/LAGUNONAK MB.
Aurreko etapetako bat. / LAGUNONAK MB.

Albaina eta Biasteri arteko 25 kilometroak egingo dituzte eta 7:30ean irtengo da autobusa Azpeititik

ELI AIZPURUAZPEITIA.

Oporraldiaren ostean, zapatu honetan, Ardoaren eta Arrainaren Ibilbideko zazpigarren etapa egingo dute Lagun Onak Mendi Bazkunako kideek. Albaina eta Biasteri artean burutuko da ibilaldia. 07:30ean abiatuko dira anbulatorio aurretik Albainara joateko, eta han sartuko dira GR-38 bidean.

25 kilometroko ibilbidea izango da, eta besteak beste, «Gobesko Kobak ikusiko ditugu, Lañora iritsi arte. Ondoren, basotik Lagranerako bidea hartuko dugu, eta hamaiketakoa egiteko 15 minutuko tartea hartuko dugu. Horrez gain, Lagranen 10-15 minutu izango ditugu osatzen ari garen GR-38 ibilbidearen Interpetrazio Zentroa ikusteko. Lagrandik aurrera, eguneko igoera nagusia izango dugu; 'Paso del Toro' lepoa igoko dugu. Han, 20-30 minutuko geldialdia egingo dugu bazkaltzeko. Ibilaldia amaitzeko Biasterira jaitsiko gara, 16:00-16:30 aldean. Biasterin denbora bat izango dugu libre, eta ondoren autobusez itzuliko gara Azpeitira», adierazi dute mendizale elkartetik.

Irteeran parte hartu nahi dutenek, osteguna, irailaren 19a, baino lehen eman beharko dute izena, elkarteko tabernan edo Lagun Onak Mendi Bazkunaren webgunean. Bazkideek zortzi euro ordainduko dute, eta gainontzekoek hamar.

Urriaren 19an amaituko dute Ardoaren eta Arrainaren ibilbidea eta azken egunean bazkaria egitea aurreikusten da. Hori dela eta, ibilaldi honetan hasiko dira urriko azken etaparako eta bazkarirako txartelak saltzen. Egun horretan goizean egingo dute azken etapa, eta ondoren bazkaria izango dute 'El Embarcadero' jatetxean. Ibilaldi horretarako eta bazkarirako txartelak 50 euroan salduko dira.