Aitor Mimenzak eta Ainara Urrutiak irabazi dute Urrestillako herri krosa

Lasterketa nagusiko podiuma, gizonezkoen eta emakumezkoen mailan. / UZTARRIA
Lasterketa nagusiko podiuma, gizonezkoen eta emakumezkoen mailan. / UZTARRIA

ELI AIZPURUAZPEITIA.

Pasa den zapatuan Urrestillako sanjoanen atariko ekitaldi garrantzitsu bat ospatu zen, bertako XVII. herri krosa, alegia. Adin guztietako korrikalariz bete zen herria. Aurrebenjaminak izan ziren korrika ateratzen lehenak. Ondoren, benjaminak, kimuak, eta infantilak egin zuten lasterka eta azkenik,lasterketa nagusia jokatu zen; kadeteak, jubenilak, seniorrak eta beteranoak batera atera ziren.

Korrikalari guztietan azkarrena Aitor Mimenza elorriarra izan zen, 28:14 denborarekin, eta bi minutuko aldea atera zion bigarrenari, hau da, Mikel Garateri. Hirugarren korrikalaria, Ibon Aranguren, hiru minutura iritsi zen helmugara. Nesketan azkarrena Ainara Urrutia aretxabaletarra izan zen, 37:35 denbora eginda; bigarren, tarte gutxirekin, Mari Karmen Seijas azkoitiarra sailkatu zen; eta hirugarren, berriz, Vanessa Cerrajero azpeitiarra.

Lasterketa nagusiaz aparte atletismoaren festa bihurtu ohi da ekitaldia eta zapatukoa ere hala izan zen. Dozenaka haurrek, kategoriatan banatuta hartu zuten parte, eta denek eraman zuten oparia etxera.

Behin krosa ospatuta, festa usaina nabaria da jada Urrestillan. Ostiralean Benta Zaharreko Mutiko Alaiak taldearekin kalejira izango da, eta zapatutik asteazkenera bitartean San Joan jaiak jarraituko dute.