Adinekoen autonomia lantzeko Goiz Lagun zerbitzua abian jarri du Udalak

Leire Goenaga eta Estitxu Elduiaen zinegotziak. /  E.A.
Leire Goenaga eta Estitxu Elduiaen zinegotziak. / E.A.

Hauskortasun egoeran daudenei laguntzeko balioko du eta goizetan egingo dituzte saioak, hamabost laguneko taldeekin

E. A. AZPEITIA.

Adinekoen autonomiari eusten laguntzeko, ohiko inguruan mantentzen eta gizarteratzen laguntzeko eta etorkizunean izan ditzaketen nahasteak aurrezaindu edo atzeratzeko helburuarekin zerbitzu berri bat ipini dute abian Azpeitiko udalean. Goiz Lagun zerbitzuak hauskortasun egoeran dauden pertsonei lagundu nahi die. Horretarako, zerbitzuaren erabiltzaileekin hainbat saio egingo dituzte goizetan, eta gehienez, hamabost laguneko taldea osatuko dute.

Hiru arlo edo eremu landuko dituzte saio horietan. Alde batetik, eremu kognitiboa; eremu psiko-afektiboa, bestetik; eta harreman, aisialdi eta kultura eremua, azkenik.

Honela, gaitasun kognitiboen (atentzioa, oroimena, lengoaia...) galera aurrezaindu edo atzeratzea da helburua, gaitasun horiek estimulatzera zuzendutako teknikak erabiliz; Antsietate egoerak suposa ditzakeen efektu negatiboak edo depresio sintomak aurrezaintzea edota Komunikazioa eta talde partaidetza sentimendua suspertzea da helburua, arduradunek azaldu dutenez.

Bestalde, «gaurkotasunaren informazioa eskaintzea nahi da, errealitatea ezagutzera lagunduz eta aisialdi sortzaile eta emankor bat», suspertu nahi da.

Horretarako esku terapia -mugimenduaren bitartez, motrizitatea landuko da, egunean zehar ohiz egiten diren ekintzetan hobeto moldatzen laguntzeko eta norbanakoari kontrol sentsazioa eta autoestimua hobetzeko-; prentsa saioak -bere inguruan gertatukoaren informazioa jasotzeko aukera eskaintzen dio norbanakoari eta honen inguruan bere epai propioak garatzeko aukera emango dio-; aisi jarduerak -oinarrizko gaitasunak garatzeko- nahiz erlaxazio saioak -antsietate, depresio edo arazo fisikoak sendatzeko eta hobetzeko- egingo dituzte.

Saio hauetan parte hartzeak «galera kognitiboak atzeratzera edota aurrezaintzera lagundu dezake. Oroimena eta bestelako funtzio kognitiboak lantzen edo estimulatzen ez badira horien galtzea sor daiteke, pertsonen bizi-kalitatean eraginez. Estimulazio kognitiboa, gainera, adinean joan ahala eman daitezken oroimen arazoak aurrezaintzeko baliagarria da», azaldu dute.

Jarduerak erabiltzaileen «gustuen eta motibazioen» arabera egokituko dira. Bestalde, proiektuak aurrera egiten duen heinean, erabiltzaileen interes eta eskaerei erantzunez, «aldatzeko aukera» izango dela adierazi dute udaletik.

Interesatuek Udaleko Gizarte Zerbitzuen Sailarekin jarri beharko dute harremanetan, 943-15 71 92 telefonora deituta edo gizarte@azpeitia.eus helbidera mezua idatzita.