Azkoitia

Zaintzaileen lana «lehen planora»

Isilune Zirkuluak zaintzaileak babesteko elkarretaratzea egin zuen ostegun iluntzean herriko plazan. Hilero herriko eragile batek deitu ohi du elkarretaratzea, eta Marea Urdinari egokitu zitzaion honetakoa. Dozenaka lagun elkartu ziren plazan zaintzaile profesionalak zein ez-profesionalak aitortzea eta babestea ezinbestekoa dela aldarrikatzeko. Elkarteak hainbat neurri eskatu zituen, besteak beste, Gizarte Segurantzako kotizazioa, prestazio ekonomiko duina, lanaren gogortasuna kontuan hartzea, osasun fisiko eta mentala zaintzea, atseden eskubidea bermatzea edota zaintzailearen rola amaitzen denerako bidezko trantsizioa ziurtatzea.