«Goi mailako idiak baino ez dira arituko aurtengo Andramaixetan»

Aitor Aizpurua Azkoitiko Probazale Elkarteko kidea. / SUDUPEX
Aitor Aizpurua Azkoitiko Probazale Elkarteko kidea. / SUDUPEX

Probak 1.850 kiloko 'Diva' harriarekin egingo dira | Abuztuaren 17tik 21era, lau egunetan, 13 uztarri arituko dira Gurea frontoiko probalekuan

JOAQUIN SUDUPE AZKOITIA.

Andramaixetako egitarauaren barne, aurten ere, idi-demak bere tokia izango dute. Lau egunetan zehar, X. Diva, S.A.T. saria jokatuko da, gaueko 22:00etan hasita, Azkoitiko Gurea frontoiko herriko probalekuan.

Guztira, 13 uztarri arituko dira eta «denak espresuki, Azkoitira etortzeko gonbidatuak dira, goi mailako idiak baino ez dira arituko Andramaixetan», dio Aitor Aizpuruak, Azkoitiko Probazale Elkarteko kideak. «Azkoitiko probalekua Euskal Herriko hoberenetakoa da, 21 metroko plaza du eta idiak lan egiteko oso egokia da. Idiak ez dira labaintzen errekarriz osaturiko soroan eta, bestalde, ikuslegoak jarrita eta eroso ikusten du proba», azpimarratu du Aitorrek.

Egunero, pisaketa lanak goizeko 10:00etan burutuko dira, 'Excavaciones Lagunak' dituen instalazioetan eta probak 1.850 kiloko 'Diva' harriarekin egingo dira. Uztarriek, 1.100 kilotik gorako kilo bakoitzeko, kilo eta erdiko gainkarga eramango dute. Proba ordu erdikoa izango da partaide bakoitzarentzat eta itzainak libreak, norberak aukeratuak, alegia.

Denak goi mailakoak izanik, badira idi pare batzuk fuerte dabiltzanak eta mantak jasotzen ari direnak. Horien artean, Laukizko Garagartza, Lezoko Olatzar, Birleko Lopategi edo eta Muruetako Kamiñoko aipatu daitezke.

Probatako egokiak diren eta gehien erabiltzen diren idiak Alistana- Sanabresa (Zamora) edo eta Tudanco (Cantabria) arrazakoak dira.

Parte-hartzaileak

Abuztuak 17an, ostirala, izango da lehen saioa eta, bertan, Korta - P. Arzadun - Garagartza - Oliden uztarriak arituko dira. Bigarrengoan, 18koa, larunbata, Telleria - Olatzar - Usaizti uztarriak arituko dira lanean. Hirugarrenean, abuztuak 20koa, astelehena, P. Illarreta - Mendigoiti - I. Lopategi uztarriak egingo dute lana eta, azkenik, abuztuak 21ean, asteartea, Kamiñoko - Zornotza anaiak - Txokolateren txanda izango da. Adierazi, herri kiroletako Gipuzkoako Federazioak kontrolatuko dituela demak eta sarreren prezioari dagokionez, lehen eta azken saioak 20 euro izango dira eta beste biak 15 euro.

Contenido Patrocinado

Fotos

Vídeos