K-baret antzerki musikala, Buero Sarien banaketan egon da Gazteizen

Sarien banaketan, K-baret antzerki musikalaren emanaldia. /
Sarien banaketan, K-baret antzerki musikalaren emanaldia.

J.S.AZKOITIA.

Larunbatean ospatu zen Cocacola Fundazioak antolatzen duen Buero sarien banaketa Gasteizko Beñat Etxepare antzokian.

Azkoitiko taldeak maiatzaren 10ean jakin zuen antzerki lehiaketan Euskadiko antzerki obra onena eskolaz kanpoko mailan izendatuko zutela. Sari nagusiaz gain, aipamen bereziak ere egon ohi dira eta 4 jasoko zituztela jakinarazi zieten. Hau da, Koreografia onena, Eszenaratze onena, Zuzendaritza onena (Kari Alberdi eta Xabier Barquero) eta Interpretazio onena (Aitor Ayerdi).

Egun batzuetara estatu mailako antolakuntzaren dei bat jaso zuten, azkenean sariak ezin zizkietela eman taldeko protagonista batzuk 21 urte baino gehiago zituztela esanez. Azkenik, Antolakuntza autonomikoak, barkamena eskatzeko asmoz, sarien banaketa K-bareteko kideen esku uztea proposatu zuten. Asko eztabaidatu ostean, taldearen izena zabaltzeko aukera ona zela argudiatuz gonbidapena onartu zuten.

2020an hasiko dira K-baret obrarekin herri ezberdinak bisitatzen eta orain emanaldiak finkatzen dihardute. Ordura arte ez dira geldik egongo, entseguekin jarraitzeaz gain formakuntzaren aldeko apustua egingo dute. Herritarrei zuzendutako ekintzak ere prestatzea pentsatzen ari dira, uda ostean ekingo diote gogor berriro lanei.