Indar erakusketa egin zuen Anaitasunak etxean bost gol eginda Mondragoni

Anaitasunak indar erakustaldia egin zuen larunbatean. /  SUDUPE
Anaitasunak indar erakustaldia egin zuen larunbatean. / SUDUPE

Erraz menderatu zuten gorrixek ligako arerio zuzenetako bat

JOAQUIN SUDUPE AZKOITIA.

Anaitasunak sekulako indar erakustaldia egin zuen larunbatean, ligako arerio zuzenetako baten aurka. Lehen zatian bi gol eta atsedenaldiaren ostean hiru eginda menderatu zuen Xabier Artetxeren taldeak Mondragon. Bost jardunaldi jokatu dira Gipuzkoako Ohorezko Mailan eta gureek garaipena bakarrik ezagutu dute. 15 punturekin sailkapeneko liderrak dira gorrixek.

Mondragonek, baloia atzetik ateratzen utzi zion Anaitasunari eta gauzak erraztu zizkion taldeari. Presioaren lehen lerroari arazorik gabe egin zioten aurre gorrixek. Erraz aurkiten zuen presiotik irteteko bidea eta ondoren espazio handiak aurkitu zituzten zelai erditik aurrera jokoa sortzeko.

Lehen gola

Korner baten bitartez iritsi zen arratsaldeko lehen gola. Bat eta hutsekoarekin norabide berean jarraitu zuen neurketak. Kanpoko taldeak barkatu egin zuen ate aurrean, baina 30. minutuan Mikel Arzalluzek bigarren gola egin zuen. Bigarren zatian jokamoldea aldatu zuten bisitariek presioa eraginkorragoa izateko asmoz, baina asmoak ez zituzten bete.

Hiru eta hutsekoa Mikel Arzalluzek errepikatu zuen. Aldaketak eginda, neurketa joan-etorri bat izan zen. Aukerak gureek sortu zituzten joaneko horietan eta laugarrena zelairatu berria zen Ander Pastrianek egin zuen eta festa Jon Letamendiak borobildu zuen.

Artetxek amaieran azpimarratu zuen taldea «uneoro ondo» egon zela. «Momentu guztietan zer egin jakin izan du taldeak. Hamaikakoan zelairatu direnek eta gero zelairatu direnek, denek eman dute maila», azaldu zuen entrenatzaileak. Datorren asteburuan Hernaniko Zubipe zelaian jokatuko dute, 16:30ean.

 

Fotos

Vídeos